ប្រធានគោលនយោបាយការបរទេសរបស់សហភាពអឺរ៉ុបបានព្រមានកាលពីថ្ងៃអាទិត្យអំពីការកើនឡើងនៃអំពើហិង្សា ចំពេលមានការវាយប្រហារកាន់តែខ្លាំងឡើងរបស់អ៊ីស្រាអែលលើតំបន់ហ្គាហ្សា ដែលនាំទៅដល់ការកើនឡើងចំនួនអ្នកស្លាប់ស៊ីវិលនៅក្នុងតំបន់ដែលពួកគេឡោមព័ទ្ធ។ លោក Josep Borrell បានថ្លែងបែបនេះនៅប្រទេសបារ៉ែនក្នុងសន្និសីទសារព័ត៌មានរួមគ្នាមួយជាមួយរដ្ឋមន្ត្រីការបរទេសកាតា Mohammed bin Abdulrahman bin Jassim Al-Thani ។
លោក Borrell បាននិយាយទៀតថា លោកបានទទូចលើការគោរពច្បាប់មនុស្សធម៌អន្តរជាតិ និងការអត់ធ្មត់ជាអតិបរមាចំពោះជនស៊ីវិលនៅក្នុងកិច្ចប្រជុំរបស់លោកជាមួយមន្ត្រីអ៊ីស្រាអែល។ ប៉ុន្តែចំនួនអ្នកស្លាប់ និងរបួស ជាពិសេសចំនួនកុមារ ធ្វើឱ្យយើងជឿជាក់ថា ចាំបាច់ត្រូវធ្វើបន្ថែមទៀត ដើម្បីរក្សាអាយុជីវិតរបស់ជនស៊ីវិល។ លោកបានថ្លែងអំណរគុណជាពិសេសចំពោះកាតាសម្រាប់ “កិច្ចខិតខំប្រឹងប្រែងការទូតក្នុងតំបន់ និងអន្តរជាតិ”។ លោកបានបន្ថែមថា៖ «កាតាបានលេចចេញជាអ្នកសម្រុះសម្រួលសំខាន់មួយ ហើយមិនត្រឹមតែនៅមជ្ឈិមបូព៌ាប៉ុណ្ណោះទេ។ នៅក្នុងវិបត្តិជាច្រើនទៀត»។
ការិយាល័យប្រព័ន្ធផ្សព្វផ្សាយក្នុងតំបន់GAZAបាននិយាយកាលពីថ្ងៃអាទិត្យថា ចំនួនអ្នកស្លាប់នៅក្នុងការវាយប្រហាររបស់អ៊ីស្រាអែលលើតំបន់ហ្គាហ្សាស្ទ្រីប ចាប់តាំងពីថ្ងៃទី 7 ខែតុលា បានកើនឡើងដល់ 13,000 នាក់ រួមទាំងកុមារជាង 5,500 នាក់ និងស្ត្រីចំនួន 3,500 នាក់។ នៅក្នុងរបាយការណ៍ដដែលបានឱ្យដឹងទៀតថា ចំនួនអ្នករងរបួសមានលើសពី 30,000 នាក់ ដោយច្រើនជាង 75% នៃពួកគេគឺជាកុមារ និងស្ត្រី។ រដ្ឋបាលបាននិយាយថា ចំនួនអ្នកបាត់ខ្លួនមានលើសពី 6,000 នាក់ ដោយពួកគេភាគច្រើនត្រូវបានគេសង្ស័យថា បានស្ថិតនៅក្រោមគំនរបាក់បែកនៃសំណង់អគារដែលដួលរលំ។
អគាររាប់ពាន់រួមទាំងមន្ទីរពេទ្យ វិហារអ៊ីស្លាម និងព្រះវិហារ ត្រូវបានខូចខាត ឬបំផ្លាញនៅក្នុងការវាយប្រហារឥតឈប់ឈររបស់អ៊ីស្រាអែល លើតំបន់GAZAនេះ។ ការបិទផ្លូវរបស់អ៊ីស្រាអែលក៏បានកាត់ផ្តាច់តំបន់នេះពីការផ្គត់ផ្គង់ប្រេងឥន្ធនៈ អគ្គិសនី និងទឹក និងកាត់បន្ថយការផ្តល់ជំនួយ។ អ៊ីស្រាអែលបានច្រានចោលការអំពាវនាវកាន់តែខ្លាំងឡើងសម្រាប់បទឈប់បាញ់រហូតដល់ការដោះលែងចំណាប់ខ្មាំងដែលកាន់កាប់ដោយក្រុមហាម៉ាស៕
ប្រភព៖ A News
ប្រែសម្រួលដោយ៖ វាសនា
