ការិយាល័យប្រព័ន្ធផ្សព្វផ្សាយក្នុងតំបន់GAZAបាននិយាយកាលពីថ្ងៃពុធម្សិលម៉ិញនេះថា ចំនួនមនុស្សស្លាប់នៅក្នុងការវាយប្រហារតាមផ្លូវអាកាស និងផ្លូវគោករបស់អ៊ីស្រាអែលលើតំបន់ហ្គាហ្សាស្ទ្រីប ចាប់តាំងពីការវាយលុករបស់ពួកហាម៉ាស់ទៅលើអ៊ីស្រាអែលកាលពីថ្ងៃទី៧ ខែតុលា បានកើនឡើងដល់ចំនួន14,532 នាក់ រួមទាំងកុមារជាង 6,000 នាក់ និងស្ត្រី 4,000 នាក់ផងដែរ។
នៅក្នុងសេចក្តីថ្លែងការណ៍ដដែលបានលើកឡើងថា ចំនួនអ្នកស្លាប់ក្នុងចំណោមបុគ្គលិកពេទ្យបានកើនឡើងដល់ 205 នាក់ រួមទាំងវេជ្ជបណ្ឌិត គិលានុបដ្ឋាយិកា និងគ្រូពេទ្យផងដែរ។ សមាជិកក្រុមការពារជនស៊ីវិលចំនួន ២៥នាក់ និងអ្នកកាសែត ៦៤នាក់ក៏ស្ថិតក្នុងចំណោមអ្នកដែលត្រូវបានគេសម្លាប់នោះដែរ។ ការិយាល័យដដែលនោះបានដាក់ចំនួនអ្នករបួសជាង ៣៥.០០០ នាក់ ដោយនិយាយថា ជាង ៧៥% ជាកុមារ និងស្ត្រី។
ចំនួនអគាររដ្ឋាភិបាលដែលត្រូវបានបំផ្លាញបានកើនដល់ ១០២អគារ រួមនឹងសាលាចំនួន ២៦៦ ដែលក្នុងនោះមាន ៦៧កន្លែង លែងដំណើរការហើយ។ វិហារឥស្លាមចំនួន ៨៥ ត្រូវបានបំផ្លាញទាំងស្រុង ខណៈ ១៧៤ ខ្នងត្រូវបានខូចខាត។ ព្រះវិហារចំនួនបីក៏ត្រូវបានកំណត់គោលដៅផងដែរ។
ទាក់ទងនឹងលំនៅឋានវិញ មានផ្ទះចំនួន ៤៥,០០០ខ្នងត្រូវបានរុះរើទាំងស្រុង ខណៈដែល ២៣៣,០០០ខ្នង ប្រឈមនឹងការបំផ្លិចបំផ្លាញដោយផ្នែក។ យ៉ាងហោចណាស់មានមន្ទីរពេទ្យចំនួន 26 និងមណ្ឌលសុខភាពចំនួន 55 បានបិទសេវាកម្មផងដែរ។ កងកម្លាំងអ៊ីស្រាអែលបានកំណត់គោលដៅរថយន្តសង្គ្រោះចំនួន 56 គ្រឿង ដោយរថយន្តជាច្រើនផ្សេងទៀតត្រូវបានដំណើរការដោយសារកង្វះប្រេងឥន្ធនៈ។ ទីផ្សារ និងហាងពាណិជ្ជកម្មកំពុងមានបញ្ហាកង្វះខាតទំនិញសំខាន់ៗ និងមុខម្ហូបផ្សេងៗ។ ចំណែកហាងនំប៉័ងបានបិទប្រតិបត្តិការទាំងស្រុង៕
ប្រភព៖ A News
ប្រែសម្រួលដោយ៖ វាសនា
