ភ្នំពេញ៖ ជនដៃដល់ ដែលបានធ្វើសកម្មភាពសម្លាប់នារីជាសង្សាររបស់ខ្លួនរួចយកទៅព្យួរកនៅបន្ទប់ទឹករហូតធំក្លិនស្អុយទើបបែកការនៅខណ្ឌពោធិ៍សែនជ័យ រាជធានីភ្នំពេញកាលពីម្សិលមិញនោះ ត្រូវបានសមត្ថកិច្ចធ្វើការឃាត់ខ្លួននៅប៉ុស្តិ៍នគរបាលរដ្ឋបាលស្រុកក្រឡាញ់ខេត្តសៀមរាប ខណៈដែលជនសង្ស័យបានចូលខ្លួនទៅសារភាពនៅព្រឹកថ្ងៃទី ៨ ខែធ្នូ ឆ្នាំ២០២៣នេះ។
សូមបញ្ជាក់ផងដែរថា ករណីឃាតកម្មនេះបង្កការភ្ញាក់ផ្អើលឡើងកាលពីវេលាម៉ោង១១ព្រឹក ថ្ងៃទី៧ ខែធ្នូ ឆ្នាំ២០២៣ នៅភូមិត្រពាំងថ្លឹង ២ សង្កាត់ចោមចៅទី១ ខណ្ឌពោធិ៍សែនជ័យ។
ជនរងគ្រោះក្នុងករណីអំពើឃាតកម្មនេះ មានឈ្មោះ ស៊ីមរ៉ាឌី ភេទស្រីអាយុ១៩ឆ្នាំ មុខរបរកម្មការិនីរោងចក្រ ស្នាក់នៅបន្ទប់ជួល ១២សេ ក្នុងភូមិត្រពាំងថ្លឹង២ សង្កាត់ចោមចៅទី១ ខណ្ឌពោធិ៍សែនជ័យ មានស្រុកកំណើត នៅភូមិសំបួរ ឃុំព្រៃគុយ ស្រុកកំពង់ស្វាយ ខេត្តកំពង់ធំ។
តាមការបំភ្លឺរបស់ឈ្មោះលំ តាំងយី ភេទស្រីអាយុ៤៣ឆ្នាំ ត្រូវជាម្តាយជនរងគ្រោះបានរៀបរាប់ថា កាលពីថ្ងៃទី៥ ខែធ្នូ ឆ្នាំ២០២៣ វេលាម៉ោង១៩ និង១៥នាទី មិនឃើញកូនស្រីរបស់គាត់ចេញពីធ្វើការត្រឡប់មកបន្ទប់ជួល ដែលស្នាក់នៅជាមួយគាត់នោះទេ ពេលនោះគាត់បានតេទូរស័ព្ទចំនួន២ដងតែគ្មានអ្នកលើក ខំដើររកក៏មិនឃើញ។ លុះរហូតមកដល់ថ្ងៃទី៧ ខែឆ្នាំដដែល រូបគាត់ក៏បបួលបងប្អូនជីដូនមួយរបស់គាត់មកមើលនៅបន្ទប់ជួលលេខ៣៧ ជាន់ទី១ ភូមិត្រពាំងថ្លឹង២ សង្កាត់ចោមចៅទី១ ខណ្ឌពោធិ៍សែនជ័យ ដែលត្រូវជាសង្សាររបស់កូនស្រីរបស់គាត់ ឈ្មោះផា ភេទប្រុស តែទ្វារចាក់សោខាងក្រៅ ពេលនោះក៏ធំក្លឹនស្អុយរូបគាត់ ក៏ចុចពិលអើតមើលក៏ឃើញសពកូនស្រីរបស់គាត់ចង.កជាប់ទៅនឹងទ្វារបន្ទប់ទឹកទើបរាយការណ៍ទៅសមត្ថកិច្ចតែម្តង។
ក្រោយពីទទួលបានព័ត៌មានភ្លាម កម្លាំងមូលដ្ឋានបានចុះទៅដល់ចំណុចកើតហេតុ ហើយក៏បានហុំព័ទ្ធកន្លែងកើតហេតុរងចាំជំនាញមកធ្វើកោសល្យវិច័យ ក្រោយពីកម្លាំងសមត្ថកិច្ចជំនាញពិនិត្យរួចបញ្ជាក់ថា ជនរងគ្រោះត្រូវបានឃាតកយកខ្នើយខ្ទប់ច្រមុះរួចយកទៅព្យួរកនៅបន្ទប់ទឹក រួចគេចខ្លួនបាត់។
បច្ចុប្បន្នសពត្រូវបានប្រគល់ទៅក្រុមគ្រួសារយកទៅធ្វើបុណ្យតាមប្រពៃណី ចំណែកជនដៃដល់ជាសង្សារ នៅព្រឹកថ្ងៃទី៨ ខែធ្នូ ឆ្នាំ២០២៣នេះ បានចូលខ្លួនទៅសារភាពនៅប៉ុស្តិ៍នគរបាលរដ្ឋបាលស្រុកក្រឡាញ់ ខេត្តសៀមរាប៕
ដោយ៖ វិសាល
