មនុស្សរាប់ម៉ឺននាក់នៅភាគខាងត្បូងប្រទេសថៃបានរងផលប៉ះពាល់ដោយទឹកជំនន់យ៉ាងធ្ងន់ធ្ងរដែលបានលិចលង់ផ្លូវថ្នល់ និងផ្លូវដែក បង្ខំឱ្យសាលារៀនបិទទ្វារ និងធ្វើឱ្យអ្នកស្រុកមួយចំនួនជាប់នៅក្នុងផ្ទះរបស់ពួកគេ។ ខេត្ត Narathiwat ជាខេត្តមួយនៅភាគខាងត្បូងឆ្ងាយរបស់ប្រទេសនេះ នៅជិតព្រំដែនជាមួយប្រទេសម៉ាឡេស៊ី ត្រូវបានរងផលប៉ះពាល់យ៉ាងធ្ងន់ធ្ងរបំផុត ដោយមានស្រុកមួយចំនួនបានលិចទឹកអស់ជាច្រើនថ្ងៃ ។នេះបើយោងតាមការផ្សាយរបស់ទូរទស្សន៍ Thai PBS ។
មនុស្សរាប់សិបនាក់ បានស្នើសុំជំនួយ ហើយអ្នកខ្លះកំពុងអង្គុយនៅលើដំបូលផ្ទះរបស់ពួកគេដែលលិចទឹក។ យ៉ាងហោចណាស់សាលារៀនរាប់សិបនៅក្នុងខេត្ត Narathiwat និង Yala ដែលនៅជិតខាងត្រូវបានបង្ខំឱ្យបិទ ខណៈដែលរូបភាពពីតំបន់បានបង្ហាញផ្ទះ និងហាងនានាត្រូវបានជន់លិចដោយជំនន់ទឹកភ្លៀង។
ភ្លៀងធ្លាក់ខ្លាំងជាច្រើនថ្ងៃបានបង្កបញ្ហានៅសមុទ្រផងដែរ ដោយយ៉ាងហោចណាស់មានទូកចំនួនប្រាំពីរបានលិចនៅក្នុងឈូងសមុទ្រថៃ និងសមុទ្រ Andaman ចាប់តាំងពីថ្ងៃសុក្រចុងសប្តាហ៍មុននោះមក។ ក្រុមហ៊ុនផ្លូវដែករដ្ឋរបស់ព្រះរាជាណាចក្រនេះ បាននិយាយថា រថភ្លើងដែលធ្វើដំណើរឆ្ពោះទៅភាគខាងត្បូងទៅកាន់ប្រទេសម៉ាឡេស៊ីបានឈប់នៅ Yala ចម្ងាយ 100 គីឡូម៉ែត្រពីព្រំដែន។ អាជ្ញាធរបានព្រមានប្រជាពលរដ្ឋក្នុងខេត្តឲ្យត្រៀមខ្លួនជម្លៀសចេញប្រសិនបើទឹកជំនន់កាន់តែធ្ងន់ធ្ងរ។ ទឹកជំនន់ធ្ងន់ធ្ងរក្នុងតំបន់កាលពីខែធ្នូឆ្នាំមុនបានសម្លាប់មនុស្សយ៉ាងតិចបីនាក់៕
ប្រភព៖ Al Jazeera English
ប្រែសម្រួលដោយ៖ វាសនា