ភ្នំពេញ៖ រថយន្តសណ្តោងមិនមានដឹកទូរកុងតឺន័ររបស់ផែស្ងួតសុកនបើកលឿនជ្រុលទៅបុកម៉ូតូសិស្សសាលាម្នាក់ពីក្រោយរួចកិនពីលើបណ្តាលឱ្យស្លាប់ភ្លាមៗនៅនឹងកន្លែង ។ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីម៉ោងជិត១១ព្រឹក ថ្ងៃទី២៧ ខែធ្នូ ឆ្នាំ២០២៣ នៅចំណុចក្រោមស្ពានអាកាសឈ្នះឈ្នះ ស្ថិតក្នុងភូមិជម្ពូវ័ន២ សង្កាត់ ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
សមត្ថកិច្ចបានឲ្យដឹងថា សពជនរងគ្រោះមានឈ្មោះព្រីង លៃហួយ អាយុ១៣ ឆ្នាំ ជាសិស្សស្នាក់នៅភូមិអូដឹម សង្កាត់ ចោមចៅទី៣ ខណ្ឌពោធិ៍សែនជ័យ។ចំណែកអ្នកបើកបររថយន្តឈ្មោះគាត គឿន អាយុ២៧ ឆ្នាំ ស្នាក់នៅភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ។
ប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុគេបានឃើញជនរងគ្រោះបើកម៉ូតូម៉ាកហុងដាស្កូបពី ពណ៌ខ្មៅ ពាក់ស្លាកលេខភ្នំពេញ1KL 7610 ធ្វើដំណើរ តាមបណ្តោយផ្លូវឈ្នះឈ្នះ ក្នុងទិសដៅពីត្បូងទៅជើងទើបនឹងចេញសាលារៀនបំណងទៅផ្ទះ ខណៈមកដល់ចំណុចកើតហេតុស្រាប់តែមានរថយន្តសណ្តោងរបស់ក្រុមហ៊ុនផែស្ងូតសុកន ពណ៌ខៀវ ពាក់ស្លាកលេខភ្នំពេញ3D 8479 ធ្វើដំណើរមកពីក្រោយលឿនជ្រុលទៅបុករួចកិនបណ្តាលឱ្យជនរងគ្រោះស្លាប់ភ្លាមៗនៅកន្លែងកើតហេតុ។ ភ្លាមៗនោះអ្នកបើករថយន្តត្រូវបានសមត្ថកិច្ចចរាចរណ៍នៅគោលដៅនោះឃាត់ខ្លួនបាន ហើយប្រគល់ទៅឱ្យនគរបាលប៉ុស្តិ៍ចោមចៅទី៣។
បន្ទាប់ពីកើតហេតុសមត្ថកិច្ចជំនាញបានចុះវាស់វែងយករថយន្ត និងម៉ូតូទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរងចាំដោះស្រាយគ្នានៅពេលក្រោយ។ចំណែកសពជនរងគ្រោះត្រូវបានសមត្ថកិច្ចធ្វើកំណត់ហេតុប្រគល់ទៅក្រុមគ្រួសារយកទៅធ្វើបុណ្យតាមប្រពៃណី៕
ដោយ៖វិសាល
