ភ្នំពេញ ៖ បុរសម្នាក់បើកម៉ូតូតាមដងផ្លូវត្រូវរថយន្តសណ្តោងទូកុងតឺន័របើកបញ្រ្ចាសមកបុកចំពីមុខពេញទំហឹងរួចកិនពីលើបន្ថែម បណ្តាលឱ្យបែកក្បាលស្លាប់នៅនឹងកន្លែង។ហេតុការណ៍នេះបានកើតឡើង នៅវេលាម៉ោង៤ និង៥០នាទីទៀបភ្លឺឈានចូលថ្ងៃទី២៩ ខែធ្នូ ឆ្នាំ២០២៣ នៅតាមផ្លូវជាតិលេខ៤ ខាងមុខបុរីញ៉ូថោន ក្នុងភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ។
ប្រភពពត័មានពីសមត្ថកិច្ចបានឱ្យដឹងថា នៅមុនពេលកើតហេតុ គេឃើញបុរសរងគ្រោះបានជិះម៉ូតូមួយគ្រឿងម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខ ភ្នំពេញ 1IV-7335 ធ្វើដំណើរតែម្នាក់ឯងនៅតាមបណ្តោយផ្លូវជាតិលេខ៤ក្នុងទិសដៅពីកើតទៅលិច ខណៈពេលជិះមកដល់ចំណុចកើតហេតុ ស្រាប់តែមានរថយន្តសណ្តោងទូកុងតឺន័រ ពាក់ស្លាកលេខ ភ្នំពេញ 3F-0038 បើកដោយបុរសម្នាក់ក្នុងទិសដៅបញ្រ្ចាសគ្នាពីលិចទៅកើតក្នុងល្បឿនយ៉ាងលឿនជ្រុលទៅបុកម៉ូតូជនរងគ្រោះចំពីមុខពេញទំហឹង បណ្តាលឱ្យម៉ូតូដួលចូលក្រោមកង់រថយន្តកិនទៅលើបុរសជាម្ចាស់ម៉ូតូចំក្បាលបណ្តាលឲ្យបែកខួរស្លាប់។ ភ្លាមៗនោះរថយន្តបង្កបានបន្តល្បឿនបើកទៅមុខជាច្រើនម៉ែត្រទើបឈប់ហើយអ្នកបើកបរបានចុះពីលើរថយន្តរត់គេចខ្លួនបាត់ស្រមោល ។
បន្ទាប់ពីកើតហេតុ សមត្ថកិច្ចមូលដ្ឋានប៉ុស្តិ៍ចោមចៅទី៣ បានចុះមកដល់ ហើយបានទំនាក់ទំនងទៅមន្ត្រីជំនាញចរាចរណ៍រាជធានីភ្នំពេញ មកវាស់វែងយករថយន្ត និងម៉ូតូជនរងគ្រោះទៅរក្សាទុកជាបណ្ដោះអាសន្នរង់ចាំឱ្យភាគីទាំងសងខាងចូលខ្លួនដោះស្រាយតាមនីតិវិធី ហើយសមត្ថកិច្ចជំនាញបានធ្វើកំណត់ហេតុប្រគល់សពឱ្យទៅក្រុមគ្រួសារយកទៅធ្វើបុណ្យតាមប្រពៃណី៕
ដោយ ៖វិសាល
