អារ៉ាប៊ីសាអូឌីតបានថ្កោលទោសការវាយប្រហារភេរវកម្មកាលពីថ្ងៃពុធម្សិលម៉ិញនេះ នៅក្នុងប្រទេសអ៊ីរ៉ង់ នៅអំឡុងពេលពិធីមួយដើម្បីរំលឹកដល់ឧត្តមសេនីយអ៊ីរ៉ង់កំពូលម្នាក់ដែលត្រូវបានធ្វើឃាតដោយសហរដ្ឋអាមេរិកកាលពី 4 ឆ្នាំមុន។ ក្រសួងការបរទេសអារ៉ាប៊ីសាអូឌីតបាននិយាយថា ទីក្រុង Riyadh បានច្រានចោល និងថ្កោលទោសការវាយប្រហារភេរវកម្ម សំដៅទៅលើជនស៊ីវិលនៅក្នុង Kerman ។ ហើយពួកគេបានចូលរួមរំលែកទុក្ខដល់ប្រទេសអ៊ីរ៉ង់ ចំពោះអ្នកដែលបានស្លាប់ក្នុងការបំផ្ទុះនេះ ហើយបានជូនពរឱ្យអ្នករបួសឆាប់ជាសះស្បើយ។
ការបំផ្ទុះគ្រាប់បែកនេះបានកើតឡើងនៅលើផ្លូវឆ្ពោះទៅទីបញ្ចុះសព ជាកន្លែងដែលលោក Qassem Soleimani អតីតប្រធានកងឆ្មាំបដិវត្តន៍អ៊ីស្លាម Quds Force ត្រូវបានបញ្ចុះ។ យោងតាមលោក Sayyed Mohammad Saberi ប្រធានអង្គការគ្រាអាសន្នរបស់ទីក្រុងនេះបាននិយាយថា យ៉ាងហោចណាស់មនុស្សចំនួន 103 នាក់ត្រូវបានសម្លាប់។ ហើយក្រុមមន្ត្រីនៅក្នុងប្រទេសនេះបានប្រកាសថា ការបំផ្ទុះនេះជាការវាយប្រហារភេរវកម្ម។
Soleimani ត្រូវបានសម្លាប់កាលពីថ្ងៃទី 3 ខែមករា ឆ្នាំ 2020 នៅក្នុងការវាយប្រហារដោយយន្តហោះគ្មានមនុស្សបើករបស់សហរដ្ឋអាមេរិកនៅខាងក្រៅអាកាសយានដ្ឋាន Baghdad នៅក្នុងប្រទេសអ៊ីរ៉ាក់៕
ប្រភព៖ A News
ប្រែសម្រួលដោយ៖ វាសនា