នាវាទេសចរណ៍ខ្នាតយក្ស WesterDam ផ្ទុកអ្នកដំណើរចម្រុះជាតិសាសន៍ បានចូលសំចតនៅកំពង់ផែស្វយ័តក្រុងព្រះសីហនុជាថ្មីម្តងទៀត នាវេលាម៉ោង០៧ និង៤០នាទីព្រឹកថ្ងៃទី២៥ ខែមករា ឆ្នាំ២០២៤ នេះ។
នេះជាការចូលចតលើកទី៣ បន្ទាប់ពីការចូលចតលើកទី១ នៅកំឡុងពេលដែលជំងឺកូវីដ-១៩ចូលរាតត្បាត កាលពីថ្ងៃទី១៣ ខែកុម្ភៈ ឆ្នាំ២០២០ និងលើកទី២ កាលពីថ្ងៃទី២៨ ខែធ្នូ ឆ្នាំ២០២៣ ដែលបានដឹកភ្ញៀវទេសចរចម្រុះជាតិចូលចត និងដើរទស្សនាកម្សាន្តនៅក្នុងព្រះរាជាណាចក្រកម្ពុជា។
នាវាទេសចរណ៍ខ្នាតយក្ស WesterDamនេះ មានបណ្តោយប្រវែង ២៨៥.២២ ម៉ែត្រ, ទទឹងប្រវែង ៣២.២៥ ម៉ែត្រ, ជម្រៅទឹក ៨,០០ ម៉ែត្រ។មុនពេលចូលមកចតលើកទី៣ នៅព្រះរាជាណាចក្រកម្ពុជានេះ នាវាទេសចរណ៍ខ្នាតយក្ស WesterDam មកពីប្រទេសវៀតណាម ដោយបានដឹកភ្ញៀវទេសចរចម្រុះជាតិសាសន៍ចំនួន ១.៨៧៤នាក់ ក្នុងនោះស្រីចំនួន ៩៨៦នាក់, មាន៤៣សញ្ជាតិ និងនាវឹកចំនួន ៧៧៦នាក់ ក្នុងនោះស្រីចំនួន១២៨នាក់,មាន៣៧សញ្ជាតិផងដែរ។
បន្ទាប់ពីចូលចតនៅកំពង់ផែស្វយ័តក្រុងព្រះសីហនុរយៈពេលមួយថ្ងៃនាវាទេសចរណ៍ខ្នាតយក្ស WesterDam សញ្ជាតិអាមេរិកមួយនេះនឹងចាកចេញទៅវិញ នាវេលាម៉ោង២១យប់ថ្ងៃទី២៥ ខែមករា ឆ្នាំ២០២៤នេះ ដើម្បីបន្តដំណើរទៅកាន់ប្រទេសថៃ៕
ដោយ៖ សំណាង
