មួយរយៈកន្លងមកនេះ មាននាវាទេសចរណ៍អន្តរជាតិខ្នាតយក្សជាច្រើនបានដឹកភ្ញៀវទេសចរចម្រុះជាតិសាសន៍ចូលមកចតនៅកំពង់ផែក្រុងព្រះសីហនុ ខេត្តព្រះសីហនុជាបន្តបន្ទាប់ ដើម្បីចូលទស្សនាប្រទេសកម្ពុជា។
នៅព្រឹកព្រលឹមថ្ងៃទី ២៩ ខែមករា ឆ្នាំ២០២៤នេះ នាវាទេសចរណ៍ខ្នាតយក្សមួយគ្រឿងទៀតឈ្មោះ SEA BOURN ENCORE សញ្ជាតិ BAHAMAS បានចូលចតកំពង់ផែស្វយ័តក្រុងព្រះសីហនុ ដោយបានដឹកភ្ញៀវទេសចរចម្រុះជាតិសាសន៍ចំនួន៥២៤នាក់ ស្រី២៦៥នាក់, មាន២៨សញ្ជាតិ មកទស្សនាប្រទេសកម្ពុជាមួយថ្ងៃ ក្នុងនោះភ្ញៀវទេសចរច្រើនជាងគេមកពីប្រទេសអាមេរិកចំនួន២១០នាក់។
នាវាទេសចរណ៍ខា្នតយក្សនេះមាននាវិកបម្រើការចំនួន៤២៦ នាក់ ស្រី១០៤នាក់ ដោយការធ្វើដំណើរមកពីប្រទេសវៀតណាម ចូលមកកម្ពុជា និងបន្តដំណើរទៅប្រទេសថៃ នាវេលាម៉ោង ២០.០០នាទី ថ្ងៃទី២៩ ខែមករា ឆ្នាំ២០២៤នេះ៕
ដោយ៖ សំណាង