កម្មករដាក់ឥដ្ឋ៣នាក់បានរងរបួសធ្ងន់ ស្រាល នៅពេលពួកគេដាក់ឥដ្ឋចំពីលើគ្រាប់មីនបណ្តាលឱ្យវាផ្ទុះឡើងលាន់ឮដូចគ្រាប់រន្ទះ។ ឯកឧត្តម ហេង រតនា អគ្គនាយកនៃមជ្ឈមមណ្ឌលកំចាត់មីនកម្ពុជា(CMAC)បានឱ្យដឹងថា បន្ទាប់ពីហេតុការណ៍នេះកើតឡើងភ្លាមកំលាំងជំនាញនៃអង្គភាពស៊ីម៉ាក់បានចូលទៅឆែកបើកផ្លូវសុវត្ថិភាពជុំវិញនោះ ទំហំដីតូចមួយទេ តែកម្លាំងជំនាញបានរកឃើញគ្រាប់មីនជិត១០០គ្រាប់។ ចុះបើដីអភិវឌ្ឍន៍នោះមានដីរាប់រយហិកតា ស្ថិតនៅចំលើប្លង់ចម្ការមីនតែម្តងបែបនេះ មានន័យថានៅមានគ្រាប់ច្រើនណាស់ដែលនៅសេសសល់ នៅតែអាចបង្កគ្រោះថ្នាក់គ្រប់ពេលវេលាទាំងកំពុងអភិវឌ្ឍន៍ និងការប្រើប្រាស់ដីតំបន់នោះយូរអង្វែងតទៅបើសិនជាគ្មានការបោសសម្អាតគ្រាប់មីនចេញទេនោះ។
ឯកឧត្តម ហេង រតនា បានបន្តទៀតថា ការអភិវឌ្ឍន៍ក្នុងតំបន់ចម្ការមីន ឬតំបន់សង្ស័យមានមីនឬសំណល់យុទ្ធភណ្ឌសង្គ្រាម ត្រូវតែធ្វើការបោសម្អាតគ្រាប់មីន និងសំណល់ជាតិផ្ទុះជាមុនសិន ដើម្បីធានាសុខសុវត្ថិភាព និងអនុលោមតាមច្បាប់រដ្ឋ។
ករណីកម្មរដាក់ឥដ្ឋ៣នាក់ រងរបួសដោយសារផ្ទុះគ្រាប់មីននេះបានកើតឡើងនៅថ្ងៃទី៣១ ខែមករា ឆ្នាំ២០២៤ នៅក្នុងភូមិសាស្ត្រស្រុក វាលវែង ខេត្តពោធិ៍សាត់៕
ដោយ៖ សំណាង
