ទីស្នាក់ការកណ្តាលនៃកងកម្លាំងការពារព្រំដែនរបស់ប្រទេសបង់ក្លាដែសបាននិយាយកាលពីថ្ងៃច័ន្ទម្សិលម៉ិញនេះថា ប៉ូលីសព្រំដែនរបស់របបយោធាមីយ៉ាន់ម៉ាជិត 100 នាក់បានភៀសខ្លួនពីរដ្ឋរ៉ាឃីនទៅកាន់ប្រទេសបង់ក្លាដែស ដើម្បីគេចពីការប្រយុទ្ធគ្នាយ៉ាងខ្លាំងក្លាជាមួយកងទ័ពអារ៉ាកានចាប់តាំងពីម៉ោង 8 ព្រឹកនៅព្រឹកថ្ងៃអាទិត្យ។ ក្រុមមន្ត្រីបាននិយាយថា ពួកគេបានឆ្លងព្រំដែនពីទីប្រជុំជន Maungdaw នៃរដ្ឋរ៉ាឃីន ទៅកាន់ស្រុក Bandarban របស់ប្រទេសបង់ក្លាដែស បន្ទាប់ពីការប្រយុទ្ធគ្នាយ៉ាងខ្លាំងក្លា ខណៈដែលកងទ័ពអារ៉ាកាន (AA)បានរុលទៅមុខពីភាគខាងត្បូង។
ពួកគេបាននិយាយថា ប៉ូលីសការពារព្រំដែនមីយ៉ាន់ម៉ាចំនួន 95នាក់ បានចូលទៅប្រទេសបង់ក្លាដែសជាមួយនឹងអាវុធរបស់ពួកគេ ហើយពួកគេត្រូវបានដកហូតអាវុធ និងត្រូវបានចាប់ខ្លួន។ មន្ត្រីបង់ក្លាដែសម្នាក់បាននិយាយថា ប៉ូលីសឆ្មាំព្រំដែនមីយ៉ាន់ម៉ាប្រហែល 100 នាក់ទៀតកំពុងរង់ចាំនៅក្នុងប្រទេសមីយ៉ាន់ម៉ាឆ្លងកាត់ផ្នែកខ្លះនៃក្រុង Ghumdum ជាកន្លែងដែលកងកាំភ្លើងយោធាមីយ៉ាន់ម៉ាកំពុងបាញ់ផ្លោងនៅតំបន់ជុំវិញពួកគេដើម្បីការពារការវាយប្រហារបន្ថែមទៀតលើប៉ុស្តិ៍ព្រំដែនរបស់ពួកគេ។ ក្រុមមន្ត្រីបាននិយាយថា ទាហានដែលរងរបួសយ៉ាងធ្ងន់ធ្ងរប្រហែល10 នាក់មកពី AA ក៏បានទទួលការព្យាបាលនៅក្នុងមន្ទីរពេទ្យបង់ក្លាដែសដាច់ដោយឡែកនៅតាមព្រំដែន។
ជាមួយគ្នានោះ កងទ័ពAA ក៏បានប្រកាសកាលពីថ្ងៃច័ន្ទថា ទាហានរបបយោធាជិត 60នាក់បានភៀសខ្លួនទៅកាន់ប្រទេសបង់ក្លាដែស បន្ទាប់ពីការវាយប្រហាររបស់ខ្លួនទៅលើប៉ុស្តិ៍ព្រំដែនរបស់របបយោធាចំនួនពីរក្នុងសង្កាត់ Maungdaw ក្បែរព្រំដែនបង់ក្លាដែសកាលពីថ្ងៃអាទិត្យ។ហើយថា ពួកគេបានកាន់កាប់ទីស្នាក់ការ Taungpyo Letya និងរឹបអូសបាននូវគ្រាប់រំសេវជាច្រើន ហើយកំពុងព្យាយាមដណ្តើមយកប៉ុស្តិ៍មួយទៀត។
កាលពីពាក់កណ្តាលខែមករាកន្លងទៅនេះ ក្រុម AA បានដណ្តើមកាន់កាប់ទីក្រុង Paletwa នៅភាគខាងត្បូងរដ្ឋ Chin ដែលមានចម្ងាយប្រហែល12 ម៉ាយពីព្រំដែនបង់ក្លាដែសតាមដងទន្លេ Kaladan ហើយបន្តទៅមុខទៀត។
ទាហានមីយ៉ាន់ម៉ាជាច្រើននាក់បានភៀសខ្លួនចេញពីការប្រយុទ្ធគ្នានៅក្នុងរដ្ឋរ៉ាឃីន និងរដ្ឋឈិន ដើម្បីសុវត្ថិភាពនៅក្នុងប្រទេសឥណ្ឌាក្នុងរយៈពេលប៉ុន្មានខែថ្មីៗកន្លងមកនេះ។
ចាប់តាំងពីការចាប់ផ្តើមប្រតិបត្តិការលេខ ១០២៧ នៅថ្ងៃទី ២៧ ខែតុលា ឆ្នាំ ២០២៣មក សម្ព័ន្ធមិត្តនៃកងទ័ពសីលធម៌ចំនួនបី រួមទាំង AA បានដណ្តើមកាន់កាប់ភាគច្រើននៃរដ្ឋសានភាគខាងជើង រួមទាំងទីក្រុងប្រហែល 20 និងផ្លូវពាណិជ្ជកម្មសំខាន់ៗជាមួយប្រទេសចិនផងដែរ៕
ប្រភព៖ The Irrawaddy
ប្រែសម្រួលដោយ៖ វាសនា
