កោះខ្យងពិតជាមានទេសភាពធម្មជាតិស្រស់ស្អាតខ្លាំងណាស់សម្រាប់ភ្ញៀវទេសចរជាតិ និងអន្តរជាតិសម្រាកលម្ហែរកាយនាថ្ងៃចុងសប្តាហ៍ ឬថ្ងៃឈប់សម្រាកបុណ្យជាតិនានា។កោះនេះមានទីតាំងស្ថិតនៅក្នុងភូមិខ្សាច់ក្រហម ឃុំជីខក្រោម ស្រុកស្រែអំបិល ខេត្តកោះកុង មានចម្ងាយជាង១០គីឡូម៉ែត្រពីទីរួមស្រុកស្រែអំបិលនៃ ខេត្តកោះកុង។
កោះខ្យង គឺជាប្រជុំកោះតូចៗចំនួន៣ជាប់ៗគ្នា ដែលរំលេចខ្លួននៅលើផ្ទៃទឹកសមុទ្រយ៉ាងស្រស់ស្អាតគ្មានពីរ។ ក្រៅពីមានទេសភាពផ្ទៃទឹកសមុទ្រពណ៌ខៀវស្រងាត់ព័ទ្ធជុំហើយនោះ ក៏មានដើមដូងខ្ពស់ទាបជាច្រើន ដុះយ៉ាងត្រៀបត្រានៅលើកូនកោះទាំងនោះ អមដោយខ្យល់អាកាសបរិសុទ្ធទៀតគឺវាមានលក្ខណៈអំណោយផលយ៉ាងខ្លាំងសម្រាប់ភ្ញៀវទេសចរជាតិ និងអន្តរជាតិទៅបោះតង់សម្រាកលម្ហែកាយនៅលើដែនកោះទាំងនោះ។
បើតាមមន្ត្រីអាជ្ញាធរមូលដ្ឋាននៅទីនោះបានឱ្យដឹងថា ចំពោះស្ថានភាពផ្លូវធ្វើដំណើរវិញមិនពិបាកនោះទេគឺមានភាពងាយស្រួល ទាំងរថយន្ត និងម៉ូតូ អាចទៅដល់កន្លែងឡើងទូកតែម្ដង៕
ដោយ៖ សំណាង