មនុស្សរាប់ពាន់នាក់កំពុងភៀសខ្លួនចេញពីអំពើហឹង្សានៅភាគខាងកើតសាធារណរដ្ឋប្រជាធិបតេយ្យកុងហ្គោ ខណៈដែលការប្រយុទ្ធគ្នាកាន់តែខ្លាំងរវាងកងទ័ពកុងហ្គោ និងក្រុមប្រដាប់អាវុធ M23 ។ ក្រុមអ្នកប្រយុទ្ធត្រូវបានគេរាយការណ៍ថា បានឡោមព័ទ្ធទីក្រុងយុទ្ធសាស្ត្រ Sake កាលពីថ្ងៃពុធម្សិលម៉ិញនេះ ដែលជាជំហានដ៏សំខាន់មួយ មុនពេលទៅដល់ទីក្រុង Goma ដែលជារដ្ឋធានីនៃ North Kivu ។ ការចាប់យក Sake នឹងដោះស្រាយការប៉ះទង្គិចផ្នែកដឹកជញ្ជូនដល់ទាហានកុងហ្គោ។
កងទ័ពកុងហ្គោ និងកងរក្សាសន្តិភាពរបស់អង្គការសហប្រជាជាតិបាននឹងកំពុងតស៊ូដើម្បីទប់ស្កាត់ការឈានទៅមុខរបស់ក្រុមប្រដាប់អាវុធ M23 ។ ហើយនៅពេលដែលការប្រយុទ្ធគ្នានៅតែបន្តនោះ ប្រជាពលរដ្ឋរាប់ពាន់នាក់ដែលបានភៀសខ្លួន បានមកដល់ទីក្រុង Bulengo ចម្ងាយប្រហែល 10km នៅភាគខាងលិចទីក្រុង Goma។ លោក Alain Uaykani មកពី Al Jazeera បាននិយាយដោយរាយការណ៍ពី Bulengo កាលពីថ្ងៃពុធថា មនុស្សរាប់ពាន់នាក់កំពុងនៅលើផ្លូវឥឡូវនេះ។ ដោយពួកគេព្យាយាមរត់គេចពីអំពើហិង្សា និងទៅកាន់ Goma ។ លោកបានពន្យល់ថា៖ «ពួកគេបានប្រយុទ្ធគ្នាអស់រយៈពេលមួយសប្តាហ៍មកហើយ ប៉ុន្តែនៅព្រឹកនេះម្តងទៀត ក្រុមឧទ្ទាមបានព្យាយាមដណ្តើមកាន់កាប់ទីក្រុងសំខាន់ៗ»។
លោក Uaykani បានបន្ថែមថា វានៅតែមិនទាន់ច្បាស់ថាតើកងទ័ព ឬក្រុមឧទ្ទាមពេលនេះកំពុងគ្រប់គ្រងតំបន់នេះទេ។ស្ថានភាពនៅ Sake គឺអាក្រក់ខ្លាំងណាស់ ជាមួយនឹងការប្រយុទ្ធគ្នាយ៉ាងខ្លាំងរវាងទាហាន និងក្រុមឧទ្ទាម M23 ។ ពួកគេបានវាយប្រហារដោយកាំភ្លើងធុនធ្ងន់ ហើយគ្រាប់បែកបានធ្លាក់មកលើទីក្រុង នេះជាមូលហេតុដែលយើងចាកចេញទៅទីក្រុង Goma”។នេះបើតាមJustin Musau អ្នកផ្លាស់ទីលំនៅមកពី Sake ប្រាប់ Al Jazeera។
រដ្ឋាភិបាល DRC នៅសប្តាហ៍នេះ បានសន្យាថា ខ្លួននឹងមិនអនុញ្ញាតឱ្យ Goma ដែលស្ថិតនៅជិតព្រំដែនជាមួយប្រទេស Rwanda ធ្លាក់ចូលទៅក្នុងដៃរបស់ក្រុមឧទ្ទាម M23 នោះឡើយ។ កាលពីថ្ងៃពុធ M23 បាននិយាយនៅក្នុងសេចក្តីថ្លែងការណ៍មួយថា នេះមិនមែនជាគោលដៅរបស់ខ្លួនទេ ហើយបានពណ៌នាអំពីសកម្មភាពរបស់ខ្លួនថាជា “សមយុទ្ធការពារ”។ DRC មហាអំណាចលោកខាងលិច និងក្រុមអ្នកជំនាញអង្គការសហប្រជាជាតិ បាននិយាយថា ក្រុមឧទ្ទាមដឹកនាំដោយ Tutsi ត្រូវបានគាំទ្រដោយប្រទេស Rwanda ។ ប្រទេសរ៉វ៉ាន់ដាបានបដិសេធរាល់ការជាប់ពាក់ព័ន្ធទាំងអស់ ប៉ុន្តែការចោទប្រកាន់បាននាំឲ្យមានវិបត្តិការទូតក្នុងតំបន់។
ការិយាល័យមនុស្សធម៌របស់អង្គការសហប្រជាជាតិ OCHA បាននិយាយកាលពីថ្ងៃអង្គារថា មនុស្សប្រហែល 42,000 នាក់ត្រូវបានផ្លាស់ទីលំនៅពី Masisi ចាប់តាំងពីថ្ងៃទី 2 ខែកុម្ភៈនោះមក៕
ប្រែសម្រួលដោយ៖ វាសនា
