ប្រជាពលរដ្ឋប្រទះឃើញសាកសពបុរសម្នាក់ស្លាប់ឡើងស្អុយរលួយនៅសល់តែគ្រោងឆ្អឹងនៅក្រោមដើមឈើ ក្នុងដីឡូតិ៍មួយកន្លែងខាងលិចស្ពានអាកាស៧មករា ស្ថិតក្នុងភូមិសេប៉េសេ សង្កាត់ទឹកថ្លា ខណ្ឌសែនសុខ រាជធានីភ្នំពេញ ។ហេតុការណ៍នេះបង្កឱ្យមានការភ្ញាក់ផ្អើលកាលវេលាម៉ោង១០ និង៣០ព្រឹកថ្ងៃទី២៧ ខែកុម្ភៈ ឆ្នាំ២០២៤ ហើយប្រជាពលរដ្ឋក៏បានរាយការណ៍ទៅនគរបាលមូលដ្ឋាន ដើម្បីទាក់ទងនគរបាលជំនាញចុះទៅត្រួតពិនិត្យ ។
សពបុរសរូបនោះពុំត្រូវបានគេស្គាល់អត្តសញ្ញាណឡើយ ដេកស្លាប់រលួយនៅសល់តែគ្រោងឆ្លឹង។សមត្ថកិច្ចបានឱ្យដឹងថា នៅព្រឹកថ្ងៃទី២៧ ខែកុម្ភៈនេះ មានប្រជាពលរដ្ឋម្នាក់បានចូលទៅក្នុងព្រៃដីឡូតិ៍នោះ ក៏បានប្រទះឃើញគ្រោងឆ្អឹងមនុស្សនៅក្រោមដើមសង្កែក្នុងដីឡូតិ៍ ដោយមានក្រមាក្រហមចំនួន១ចងភ្ជាប់នឹងដើមនោះ។សពជនរងគ្រោះមានស្លៀកខោខៅប៊យជើងវែង ពាក់ស្បែកជើងផ្ទាត់ពណ៌ខៀវ ។
នៅព្រឹកដដែលនេះ នគរបាលជំនាញក៏បានចុះទៅត្រួតពិនិត្យ បន្ទាប់ពីធ្វើការត្រួតពិនិត្យ និងធ្វើកោសល្យវិច័យរួច បានដាក់ការសន្និដ្ឋានថា គ្រោងឆ្អឹងនោះជាមនុស្សប្រុស ហើយបានស្លាប់ដោសារចងក ៕
ដោយ៖ សំណាង