ភ្នំពេញ៖ បុរសម្នាក់បានយកខ្សែរភ្លើងរាយឆក់ត្រីនៅត្រពាំងក្រោយផ្ទះដើម្បីយកធ្វើម្ហូបតែបែរជាភ្លាត់ស្នៀតឆក់ស្លាប់ខ្លួនឯងទៅវិញ ។ហេតុការណ៍នេះបង្កឲ្យមានការភ្ញាក់ផ្អើលឡើងកាលពីម៉ោង៨ និង៣០នាទី ព្រឹកថ្ងៃទី៨ ខែមីនា ឆ្នាំ២០២៤ នៅភូមិត្មាតពង សង្កាត់បឹងធំ ខណ្ឌកំបូល រាជធានីភ្នំពេញ។
សមត្ថកិច្ចបានឲ្យដឹងថា ជនរងគ្រោះឈ្មោះ ស៊ិន រដ្ឋា អាយុ៣១ឆ្នាំ មុខបរនៅផ្ទះ ស្នាក់នៅភូមិត្មាតពង សង្កាត់បឹងធំ ខណ្ឌកំបូល។
ប្រភពព័ត៌មានបានឱ្យដឹងថា មុនពេលកើតហេតុជនរងគ្រោះបានរាយខ្សែរភ្លើងដើម្បីឆក់ត្រីនៅត្រពាំងទឹកនៅខាងក្រោយផ្ទះ ដោយម្តាយ និងកូនតូចម្នាក់ទៀតចាំដកខ្សែរភ្លើងនៅខាងលើ ហើយជនរងគ្រោះចុះទៅឆក់ត្រីក្នុងទឹក ។ បន្ទាប់មកដោយសារតែខ្សែរមានតំដរក៏ឆក់បណ្តាលឱ្យជនរងគ្រោះដួលត្រាំក្នុងទឹក បន្ទាប់មកម្តាយក៏ចាប់ដកខ្សែភ្លើង រួចចុះទៅស្រង់ និងស្រែកឱ្យអ្នកជិតខាងនាំគ្នាជួយស្រង់មកលើគោក ហើយបានទាក់ទងទៅក្រុមសង្គ្រោះ៧១១ កងពលតូចលេខ៧០ ដើម្បីជួយសង្គ្រោះខណៈក្រុមគ្រូពេទ្យទៅដល់បានបញ្ជាក់ថា ជនរងគ្រោះបានស្លាប់បាត់ទៅហើយ ទើបរាយការណ៍ទៅសមត្ថកិច្ចមូលដ្ឋានចុះមកពិនិត្យជាក់ស្តែងរួចប្រគល់សពទៅឱ្យក្រុមគ្រួសារចាត់ចែងធ្វើបុណ្យតាមប្រពៃណី៕
ដោយ៖ វិសាល