កងទ័ពឯករាជ្យ Kachin (KIA) និងក្រុមតស៊ូសម្ព័ន្ធមិត្តបានវាយប្រហារក្នុងពេលដំណាលគ្នានូវប៉ុស្តិ៍យោធាជាង 10 នៅតាមបណ្តោយផ្លូវប្រវែង 120 ម៉ាយក្បែរព្រំដែនជាមួយប្រទេសចិនកាលពីព្រឹកថ្ងៃព្រហស្បតិ៍ រួមទាំងទីតាំងនៅជិតទីស្នាក់ការកណ្តាលរបស់ខ្លួននៅទីក្រុង Laiza ខណៈដែលការប្រយុទ្ធនៅក្នុងរដ្ឋ Kachin នៅតែបន្តកើនឡើង។កងទ័ពជនជាតិភាគតិចក៏បានរឹបអូសយកមូលដ្ឋានលើកំពូលភ្នំមួយនៅជិត Laiza បន្ទាប់ពីបានកម្ចាត់កងទ័ពរដ្ឋាភិបាលនៅជំរុំចំនួន 10 ដែលការពារមូលដ្ឋាននេះ។ នេះបើតាមអ្នកនាំពាក្យរបស់ KIA លោក Colonel Naw Bu បានប្រាប់ The Irrawaddy កាលពីល្ងាចថ្ងៃព្រហស្បតិ៍ម្សិលម៉ិញនេះ។
ការចាប់យកមូលដ្ឋាននេះគឺជាផ្នែកមួយនៃការវាយប្រហាររបស់ KIA ទៅលើប៉ុស្តិ៍នៅតាមបណ្តោយផ្លូវរវាងរដ្ឋធានីរដ្ឋ Myitkyina និងទីប្រជុំជន Bhamo នៅព្រឹកថ្ងៃព្រហស្បតិ៍។ Lazia មានទីតាំងនៅពាក់កណ្តាលផ្លូវរវាងទីក្រុង Myitkyina និង Bhamo ជិតព្រំដែនជាមួយប្រទេសចិន។
ទីស្នាក់ការការពារមូលដ្ឋានយោធាយុទ្ធសាស្ត្ររបស់របបយោធានៅតាមបណ្តោយផ្លូវ 120 ម៉ាយ កាត់តាមសង្កាត់ Bhamo និង Waingmaw។កងទ័ពមកពីកងកម្លាំងការពារប្រជាជន Kachin (PDFs) និង KIA ក៏បានប្រើប្រាស់គ្រាប់រ៉ុក្កែត ដើម្បីវាយប្រហារផ្លូវរត់នៃអាកាសយានដ្ឋាន Bhamo និងមូលដ្ឋានទ័ពអាកាសរបស់របបយោធាក្នុងទីក្រុង Myitkyina នៅព្រឹកថ្ងៃព្រហស្បតិ៍។
ប្រព័ន្ធផ្សព្វផ្សាយ Kachin បានរាយការណ៍ថា របបយោធាបានឆ្លើយតបទៅនឹងការវាយប្រហារនៅព្រឹកថ្ងៃព្រហស្បតិ៍ ដោយការបាញ់ផ្លោងតំបន់លំនៅដ្ឋាននៃទីក្រុង Laiza ពីមូលដ្ឋានមួយរបស់ខ្លួន ដោយបានធ្វើឱ្យចំនួនជនស៊ីវិលស្លាប់ដោយសារការបាញ់ផ្លោងមានចំនួនបីនាក់ ក្នុងនោះមានកូនម្នាក់។
មេដឹកនាំកងជីវពលលីស៊ូគាំទ្ររបបយោធាលោក U Shwe Min ដែលជាប្រធានគណបក្សអភិវឌ្ឍន៍ជាតិលីស៊ូក៏ត្រូវបានសម្លាប់រួមជាមួយនឹងសមាជិកកងជីវពលផងដែរ នៅអំឡុងពេលការវាយប្រហារដោយកងទ័ព KIA ក្នុងសង្កាត់ Waingmaw កាលពីថ្ងៃព្រហស្បតិ៍៕
ប្រែសម្រួលដោយ៖ វាសនា
