ភ្នំពេញ៖ នេះគឺជាដំណឹងដ៏រំភើបមួយសម្រាប់អ្នកគាំទ្រគុនខ្មែរទាំងមូល ដែលសហព័ន្ធប្រដាល់គុនខ្មែរអន្តរជាតិគ្រោងបង្កើតមូលនិធិក៏ដូចជា App គុនខ្មែរ ។សហព័ន្ធកីឡាប្រដាល់គុនខ្មែរអន្ដរជាតិនឹងរៀបចំការបង្កើតមូលនិធិគុនខ្មែរ ដើម្បីគាំទ្រដល់អត្ដពលិកគុនខ្មែរដែលមានការខ្វះខាត និងការរៀបចំព្រឹត្តិការណ៍នានា។
មូលនិធិនេះ ក៏នឹងជួយដល់ការបង្កើតគេហទំព័រ និង អេប (Application) ដែលជាបច្ចេកវិទ្យាទំនើបទាន់សម័យ ក្នុងការបំផុសចលនានៃការផ្សព្វផ្សាយកីឡាគុនខ្មែរទៅកាន់ពិភពលោក។ នេះបើតាមការបញ្ជាក់របស់ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC)។
បើយោងទៅលើវីដេអូផ្សាយរបស់ NOCC នាថ្ងៃទី២៧ ខែមីនានេះ ឯកឧត្តម វ៉ាត់ ចំរើន បានមានប្រសាសន៍ថា សហព័ន្ធកីឡាប្រដាល់គុនខ្មែរអន្ដរជាតិ នឹងបង្កើត «មូលនិធិគុនខ្មែរ» ដើម្បីអភិវឌ្ឍន៍ និងជួយដល់កីឡាករ-កីឡាការិនីដែលខ្វះខាត។ បន្ថែមពីនេះទៀត មូលនិធិនេះ ក៏បង្កើតដើម្បីការរៀបចំការងារបច្ចេកទេសផងដែរ។
«សហព័ន្ធកីឡាប្រដាល់គុនខ្មែរអន្ដរជាតិ នឹងរៀបចំឲ្យមានមូលនិធិគុនខ្មែរ ដើម្បីជួយដល់កីឡាករគុនខ្មែរ និងអភិវឌ្ឍន៍គុនខ្មែរ ទៅតាមការរៀបចំ បច្ចេកទេស ក៏ដូចជាការបំផុសចលនា ព្រោះយើងនៅមានការខ្វះខាតច្រើន។ ដូច្នេះ យើង បង្កើតមូលនិធិនេះឡើងដើម្បីជួយ ដល់ការរៀបចំគុនខ្មែរ ជាមូលនិធិរបស់សហព័ន្ធកីឡាគុនខ្មែរអន្ដរជាតិរបស់យើង។»។ នេះជាការបញ្ជាក់របស់ឯកឧត្តម វ៉ាត់ ចំរើន។
គួរជម្រាបផងដែរថា ចំពោះកិច្ចការបច្ចេកទេសនោះ ឯកឧត្តម វ៉ាត់ ចំរើន ចង់សំដៅទៅលើការងារអភិវឌ្ឍន៍បច្ចេកវិទ្យាក្នុងការផ្សព្វផ្សាយ មានដូចជា គេហទំព័រ (Website) និងអេប (Application)។ អគ្គលេខាធិការរូបនេះ បានបញ្ជាក់បែបនេះថា៖«អ្វី ដែលយើងនិយាយគ្នា គឺយើងនិយាយពីការរៀបចំធ្វើទីផ្សារនេះ ឲ្យបានខ្លាំងក្លាពីមួយជំហាន ទៅមួយជំហាន។ យើង កំពុងពង្រឹងសមត្ថភាពការងារអភិបាលកិច្ចល្អ របស់សហព័ន្ធគុនខ្មែរអន្ដរជាតិរបស់យើង ដើម្បីអាចពង្រីកឥទ្ធិពលទៅក្រៅប្រទេស ទៅឲ្យសមាជិកទាំង៥០ប្រទេសជាងរបស់យើង មានទំនុកចិត្ត និងមានការគាំទ្រមកយើង។ យើង កំពុងតែរៀបចំ បង្កើតនូវវេបសាយ និងអេប (Application) ដែលជាបច្ចេកវិទ្យាទាន់សម័យបំផុសចលនា ការផ្សព្វផ្សាយ និងការគាំទ្រ។»៕
ដោយ៖ វិកគី