យ៉ាងហោចណាស់មនុស្សចំនួន ៩ នាក់បានស្លាប់ និងជាង១.០០០ នាក់ផ្សេងទៀតបានរងរបួសកាលពីថ្ងៃពុធម្សិលម៉ិញនេះ ដោយគ្រោះរញ្ជួយដីដ៏ខ្លាំងក្លាមួយនៅតៃវ៉ាន់ ដែលបានបំផ្លាញអគាររាប់សិបខ្នង និងបានជំរុញឱ្យមានការព្រមានអំពីរលកយក្សស៊ូណាមិរហូតដល់ប្រទេសជប៉ុន និងហ្វីលីពីនថែមទៀត។
មនុស្សរាប់សិបនាក់ត្រូវបានគេជឿថា មានសុវត្ថិភាព ប៉ុន្តែមិនអាចទៅដល់តំបន់ដែលត្រូវបានកាត់ផ្តាច់ដោយការរអិលបាក់ដីដ៏ធំដែលបង្កឡើងដោយការរញ្ជួយដី ដែលភាគច្រើននៅក្នុងផ្លូវរូងក្រោមដី ដែលកាត់តាមភ្នំដែលបំបែកកោះពីខាងជើងទៅខាងត្បូង។
លោក Wu Chien-fu នាយកមជ្ឈមណ្ឌលរញ្ជួយដីនៃរដ្ឋបាលអាកាសធាតុកណ្តាលនៃទីក្រុងតៃប៉ិ បាននិយាយថា ការរញ្ជួយដីនេះគឺខ្លាំងបំផុតចាប់តាំងពីការរញ្ជួយដីមួយក្នុងកម្រិត 7.6 រិចទ័រ ដែលបានវាយប្រហារនៅក្នុងខែកញ្ញា ឆ្នាំ 1999 ដោយបានសម្លាប់មនុស្សប្រហែល 2,400 នាក់ ដោយគ្រោះមហន្តរាយធម្មជាតិដ៏សាហាវបំផុតនៅក្នុងប្រវត្តិសាស្រ្តរបស់កោះនេះ។ ការរញ្ជួយដីកម្រិត 7.4 រ៉ិចទ័រ កាលពីថ្ងៃពុធម្សិលម៉ិញនេះ បានវាយប្រហារនៅមុនម៉ោង 8:00 ព្រឹក ម៉ោងក្នុងស្រុក។
ទីភ្នាក់ងារអគ្គីភ័យជាតិបាននិយាយថា អ្នកស្លាប់ទាំងអស់គឺស្ថិតនៅក្នុងស្រុក Hualien ដោយបន្ថែមថាមនុស្សចំនួន 1,011 នាក់នៅទូទាំងកោះតៃវ៉ាន់បានរងរបួសដោយមិនបានបញ្ជាក់ពីកម្រិតធ្ងន់ធ្ងរនោះទេ៕
នៅក្នុងរដ្ឋធានីតៃវ៉ាន់ រថភ្លើងក្រោមដីបានឈប់ដំណើរការមួយរយៈពេលខ្លី ប៉ុន្តែបានដំណើរការឡើងវិញក្នុងរយៈពេលមួយម៉ោង ខណៈដែលអ្នកស្រុកបានទទួលការព្រមានពីប្រធានសង្កាត់របស់ពួកគេ ដើម្បីពិនិត្យមើលការលេចធ្លាយឧស្ម័នណាមួយ។
សេតវិមានបាននិយាយថា សហរដ្ឋអាមេរិកបានត្រៀមខ្លួនរួចជាស្រេចដើម្បីផ្តល់ជំនួយចាំបាច់ណាមួយ នៅពេលមានគ្រោះមហន្តរាយនៅដែនកោះមួយនេះ៕
ប្រភព៖ ABS-CBN News
ប្រែសម្រួលដោយ៖ វាសនា
