ក្រចេះ៖ កម្លាំងសមត្ថកិច្ចបានធ្វើការចាប់ឃាត់ខ្លួនជនជាតិចិនចំនួន ៦នាក់ និងខ្មែរ ២នាក់ ដែលធ្វើដំណើរតាមរថយន្ត lexus មួយគ្រឿងត្រូវបានបញ្ជូនទៅធ្វើការសាកសួរនៅស្នងការដ្ឋាននគរបាលខេត្តក្រចេះ នៅថ្ងៃទី២៨ ខែមេសា ឆ្នាំ២០២៤នេះ។
ក្រុមជនជាតិចិនទាំងនោះត្រូវបានកម្លាំងអធិការដ្ឋានស្រុកសំបូរ សហការជាមួយកម្លាំងប៉ុស្តិ៍រដ្ឋបាលសណ្ដាន់ ធ្វើការចាប់ឃាត់បាន ខណៈកំពុងធ្វើដំណើតាមរថយន្ត lexus 470 ពណ៌ស្ករស្លាកលេខភ្នំពេញ2G.4697 មួយគ្រឿង កាលពីវេលាម៉ោង ៩:០០នាទី ព្រឹកថ្ងៃទី២៧ ខែមេសា ឆ្នាំ២០២៤នៅចំណុច ភូមិចាត្នោល ឃុំសណ្ដាន់ ស្រុកសំបូរ ខេត្តក្រចេះ។
បើតាមប្រភពព័ត៌មានពីមន្ត្រីនគរបាលស្រុកសំបូរបានឲ្យដឹងថា រថយន្ត lexus 470 ពណ៌ស្ករ ដឹកក្រុមជនជាតិចិននោះ ត្រូវបានគេសង្ស័យថា គឺឆ្លងដែនខុសច្បាប់ចេញពីទឹកដីប្រទេសឡាវ ហើយបានឆ្លងតាមទូកមកទឹកដីកម្ពុជា ដោយមានមេខ្យល់ជាជនជាតិខ្មែរចំនួនពីរនាក់ចាំទទួលដឹកពីព្រំប្រទល់ប្រទេសឡាវដឹកមកកម្ពុជា ដើម្បីយកទៅខេត្តព្រះសីហនុ។
ប្រភពដដែលបានបន្តទៀតថា រថយន្តដឹកក្រុមជនជាតិចិននោះ មកដល់ចំណុចទឹកដីអូរគ្រៀង ក៍បានបែកការដោយសារតែរថយន្តនេះជាមុខសញ្ញាធ្លាប់ដឹកជនជាតិចិនខុសច្បាប់កាលពីពេលកន្លងទៅ ក្រោយពីដឹងពត៌មានបែបនេះ កម្លាំងសមត្ថកិច្ចក៏បើករថយន្តតាមក្រោយ រថយន្ត lexus 470 របស់ចិនដែលកំពុងជិះ ក៏ធ្វើឲ្យអ្នកបើកបររថយន្តដឹកជនជាតិចិននោះភ័យ ក៏បើករត់គេចចេញពីផ្លូវជាតិ០៧ ចូលមកតាមមាត់ទន្លេវិញ ហើយព្យាយាមបើករត់គេច ដោយសភាពការណ៍មិនស្រួលក៏បានចតរថយន្តទុកចោល រីឯជនជាតិចិន និងមេខ្យល់ខ្មែរពីរនាក់នោះក៏បាននាំគ្នារត់គេច តែទោះជាយ៉ាងណាសមត្ថកិច្ចសហការជាមួយនឹងកម្លាំងប៉ុស្តិ៍នគរបាលសណ្ដាន់ និងប្រជាការពារភូមិក៏ចាប់ជនបានមនុស្សទាំងអស់នោះមកវិញ។
លោក វរៈសេនីយ៍ឯក ជ្រិន សុធា អធិការនគរបាលស្រុកសំបូរ បានឲ្យដឹងថា ក្រោយចាប់ខ្លួនបានក្រុមជនជាតិចិនទាំងនោះត្រូវបានបញ្ជូនទៅកាន់ស្នងការដ្ឋាននគរបាលខេត្តក្រចេះរួចរាល់ហើយ។
ដោយឡែក លោកឧត្តមសេនីយទោ អ៊ូ សុបុណ្ណា ស្នងការនគរបាលខេត្ត ក្រចេះ ក៏បានឲ្យដឹងដែរថា ឥឡូវនេះកម្លាំងជំនាញកំពុងតែបន្តធ្វើការសាកសួរនៅឡើយ ដើម្បីបន្តចាត់ការទៅតាមតិវិធីច្បាប់៕
