ភ្នំពេញ ៖ អគ្គិភ័យមួយបានឆាបឆេះផ្ទះប្រជាពលរដ្ឋមួយកន្លែងយ៉ាងសន្ធោសន្ធៅ បណ្ដាលឲ្យខូចខាតផ្ទះបាយ កន្លែងស្តុបគ្រឿងកាំមេរ៉ា ព្រមទាំងម៉ូតូសរុប០៤គ្រឿង ហេតុការណ៍នេះបង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចហៅរថយន្តពន្លត់អគ្គិភ័យចេញជួយអន្តរាគមន៍បាញ់ទឹកពន្លត់កាលពីម៉ោង ៦និង៣០នាទីយប់ ថ្ងៃទី៣០ ខែមេសា ឆ្នាំ២០២៤ ស្ថិតនៅចំណុចបុរី ឡុងនី ហាង លីង អេឡិចត្រូនិច ផ្ទះលេខ០២ ផ្លូវ៣០ម៉ែត្រ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។
ក្នុងប្រតិបត្តិការនេះដែរ ដោយទទួលបានបទបញ្ជាពីឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរងនគរបាល និងជាស្នងការនគរបាលរាជធានីភ្នំពេញ លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានដឹកនាំបញ្ជាផ្ទាល់ដល់កងកម្លាំងពន្លត់អគ្គិភ័យដែលប្រចាំការនៅគ្រប់បណ្តាលគោលដៅទាំងអស់ ឲ្យចេញជួយអន្តរាគមន៍បាញ់ទឹកពន្លត់ឲ្យទាន់ពេលវេលា កុំឲ្យមានការឆាបឆេះបន្តដល់ផ្ទះប្រជាពលរដ្ឋដែលនៅក្បែរនោះ។
ក្នុងនោះកម្លាំងសមត្ថកិច្ចជំនាញបានប្រើប្រាស់រថយន្តពន្លត់អគ្គិភ័យចំនួន ១៣គ្រឿង ក្នុងនោះរួមមាន រថយន្តពន្លត់អគ្គិភ័យរបស់ការិយាល័យរាជធានីភ្នំពេញ ចំនួន១២គ្រឿង ប្រើប្រាស់ទឹកអស់០៩ឡាន ស្មើរនឹង៣៦ម៉ែត្រគូប, រថយន្តជំនួយមកពីរថយន្តក្រុមហ៊ុនស្រាបៀរកម្ពុជា ចំនួន០១គ្រឿង ប្រើប្រាស់ទឹកអស់០១ឡាន ស្មើនឹង០៤ម៉ែត្រគូប។ប្រភេទសំណង់នេះ គឺ ផ្ទះល្វែង (ថ្មបេតុង) ទំហំ (៤ម៉ែត្រ x ១៦ម៉ែត្រ) ឆេះខូចខាតផ្ទះបាយ មួយកន្លែង, ស្តុបគ្រឿងកាំមេរ៉ា ទំហំ (០៤ម៉ែត្រ x ០៣ម៉ែត្រ)អស់ទាំងស្រុង, ឆេះរាលដាលដល់កន្លែងរោងជាង រួមនឹងម៉ូតូចំនួន០៤គ្រឿងអស់ទាំងស្រុងនឹងពុំបានឆេះរាលដាលដល់ផ្ទះអ្នកក្បែរខាងឡើយ ហើយកម្លាំងសមត្ថកិច្ចជំនាញរបស់បានធ្វើការបាញ់ឲ្យរលត់ទៅវិញ នៅវេលាម៉ោង ៧ និង៤៥នាទីយប់នាថ្ងៃដដែល។
ចំពោះគ្រោះអគ្គិភ័យនេះដែរ គឺបណ្តាលមកពីការឆ្លងចរន្តអគ្គីសនីទើបបង្ករជាអគ្គិភ័យ ហើយនៅក្នុងហេតុការណ៍នេះដែរមិនបានបណ្តាលឲ្យអ្នកណាម្នាក់រងរបួសនោះឡើយ៕
ដោយ ៖ វិសាល