ភ្នំពេញ៖ ជំនួបគូឯកប្រចាំសប្តាហ៍សង្វៀនម៉ាហ្វៃកាលពីចុងសប្តាហ៍កន្លងទៅនេះ សោម វិឆ័យខំវ៉ៃមិនដកដៃ តែផ្ដាច់កីឡាករជើងខ្លាំងប្រេហ្ស៊ីល រ៉ូស្ទីម បើក អឹមធីជេ មិនបានសម្រេច ដោយសារតែកីឡាកររូបនេះស្វិតស៊ូខ្លាំងពេក។
ការប្រកួតអន្តរជាតិបីទឹកពេញវិឆ័យសម្រុកខ្លាំងនៅក្នុងទឹកទីបី បានវាយទៅវាយមក មិនសំចៃដៃ មិនដកដៃរហូតដល់កីឡាករអន្តរជាតិរូបនេះ រាប់រហូតដល់ពីរដង ប៉ុន្តែរូបគេនៅតែងើបប្រកួតបាន។ កីឡាកររូបនេះបានតស៊ូព្យាយាមបិទកណ្ដាប់ដៃរបស់វិឆ័យទាល់តែបញ្ចប់ទឹកទីបីបានយ៉ាងល្អ ។
តាមរយៈកិច្ចសម្ភាសន៍ វិឆ័យបានឲ្យដឹងថា តាមពិតគេក៏ចង់ផ្ដាច់ទឹកទីបីដែរ ប៉ុន្តែដៃគូរបស់ខ្លួនមួយនេះស៊ូខុសពីកីឡាករដទៃទៀត ហើយកីឡាកររូបនោះគេឆ្លាតដឹងពីតិចនិចរបស់ខ្លួន ដេញតាមចាប់ឱបរហូតធ្វើឲ្យពិបាកនៅក្នុងការវាយ។
ជាចុងក្រោយវិឆ័យក៏បានធ្វើការអរគុណទៅកាន់អ្នកគាំទ្រ ដែលតែងតែគាំទ្ររូបគេរហូតមក៕
ដោយ៖ វិកគី