ព្យុះស៊ីក្លូនដ៏ខ្លាំងក្លាមួយនៅឈូងសមុទ្រ Bengal ដែលបានវាយលុក និងបោកបក់មកលើឆ្នេរសមុទ្របង់ក្លាដែសកាលពីថ្ងៃអាទិត្យ ដោយបង្ខំឱ្យអាជ្ញាធរជម្លៀសប្រជាពលរដ្ឋជាង 800,000នាក់ចេញពីតំបន់នោះ។ ស្រុកជាច្រើននៅតាមមាត់សមុទ្រត្រូវបានគេនិយាយថាបានលិចលង់ទឹកដោយសារតែការកើនឡើងនៃជំនោរទឹកពី 2.5 ទៅ3.5 ម៉ែត្រ (8-12 ហ្វីត) ។

ព្យុះស៊ីក្លូនឈ្មោះ Remal បានបោកបក់នៅវេលាម៉ោង៩យប់ថ្ងៃអាទិត្យទី២៦ ខែឧសភា ​ឆ្នាំ២០២៤នេះ ម៉ោងក្នុងស្រុក ដែលបានបណ្តាលឱ្យមានភ្លៀងធ្លាក់ខ្លាំង ខ្យល់ព្យុះ និងជំនោរខ្ពស់។ អ្នកឧតុនិយមលោក Muhammad Abul Kalam Mallik បានប្រាប់ Anadolu ថា “Remal នឹងចំណាយពេលពី 6 ទៅ 7 ម៉ោងដើម្បីឆ្លងកាត់ឆ្នេរសមុទ្របង់ក្លាដែស” ។ មន្ត្រីនាយកដ្ឋានឧតុនិយមបង់ក្លាដែសបាននិយាយថា “យើងនឹងត្រូវរង់ចាំដើម្បីសិក្សាព័ត៌មានលម្អិតនៃព្យុះស៊ីក្លូន ដោយសារយើងមិនមានប្រព័ន្ធសង្កេតផ្ទាល់”។

យោងតាមលោក Mallik ព្យុះស៊ីក្លូន Remal បានបោកបក់មកក្បែរតំបន់ភាគខាងត្បូងនៃប្រទេសបង់ក្លាដែស និងកោះ Sagar នៃភាគខាងលិច Bengal ។ រដ្ឋមន្ត្រីគ្រប់គ្រងគ្រោះមហន្តរាយរបស់រដ្ឋបង់ក្លាដែស Md. Mohibur Rahman បានប្រាប់អ្នកយកព័ត៌មាននៅទីក្រុង Dhakaថា ពួកគេបានជម្លៀសមនុស្សជាង 800,000នាក់ពីស្រុកនៅតាមឆ្នេរសមុទ្រចំនួន16 ហើយបានជំរុញប្រជាជនឱ្យទៅមជ្ឈមណ្ឌលព្យុះស៊ីក្លូន ខណៈដែលរដ្ឋាភិបាលបានរៀបចំជម្រកពី 8,000 ទៅ 9,000កន្លែង ។

នៅអំឡុងពេលឆ្លងកាត់ ព្យុះស៊ីក្លូន Remal ត្រូវបានគេរំពឹងថានឹងបណ្តាលឱ្យមានល្បឿនខ្យល់អតិបរមាចន្លោះពី 110-130 គីឡូម៉ែត្រក្នុងមួយម៉ោងនៅតាមឆ្នេរសមុទ្រ ជាមួយនឹងការកើនឡើងនូវជំនោរពី 3 ទៅ 6 ម៉ែត្រ។ ការិយាល័យ Met របស់បង់ក្លាដែសបាននិយាយថា ឆ្នេរសមុទ្រ Satkhira និង Cox’s Bazar ភាគនិរតីទាំងមូលត្រូវបានគេភ័យខ្លាចថានឹងរងផលប៉ះពាល់ដោយព្យុះស៊ីក្លូន។ មកទល់ពេលនេះ មានសេចក្តីរាយការណ៍ពីអ្នកស្លាប់ និងរបួសចំនួនពីរនាក់ នៅពេលដែលយុវជន និងបុរសចំណាស់ម្នាក់ ត្រូវបានទឹករលកបោកបក់ ដែលបង្កឡើងដោយព្យុះស៊ីក្លូន នៅតំបន់ឆ្នេរ Satkhira និងស្រុក Patuakhali៕

ប្រភព៖ A News

ប្រែសម្រួលដោយ៖ វាសនា