បើយោងតាមThe Irrawaddy ចេញផ្សាយនាថ្ងៃនេះបានឱ្យដឹងថា កងទ័ពឯករាជ្យកាឈិន (KIA) បានដណ្តើមយកប៉ុស្តិ៍យោធារបស់របបយោធាមីយ៉ាន់ម៉ាចំនួនពីរកន្លែងនៅក្នុងសង្កាត់ Tanai និង Waingmaw នៃរដ្ឋ Kachin ក្នុងរយៈពេលពីរថ្ងៃមកនេះ។
កងទ័ពឯករាជ្យកាឈិនបានឱ្យដឹងថា នៅរសៀលថ្ងៃច័ន្ទម្សិលម៉ិញនេះ កងកម្លាំងរបស់ខ្លួនបានដណ្តើមយកប៉ុស្តិ៍កំពូលភ្នំ Yayngng Kan ដែលត្រូវបានគ្រប់គ្រងដោយកងទ័ពមកពីកងវរសេនាតូចថ្មើរជើងលេខ 297 និង 260 ។ ប៉ុស្តិ៍នេះមានភាពល្បីល្បាញនៅក្នុងតំបន់នេះសម្រាប់ការជំរិតយករ៉ែមាសយ៉ាងច្រើន។
បន្ថែមពីលើនេះ នៅព្រឹកថ្ងៃអង្គារនេះ KIA បានដណ្តើមយកបានប៉ុស្តិ៍ Bum Taung ដែលមានចម្ងាយ ៣២ គីឡូម៉ែត្រពីក្រុង Waingmaw។ ប៉ុស្តិ៍នេះមានសារៈសំខាន់ជាយុទ្ធសាស្ត្រសម្រាប់យោធារបស់របបយោធា ដោយសារវាស្ថិតនៅលើផ្លូវតភ្ជាប់ទីក្រុង Waingmaw និង Sadone ជាមួយ Kanpaiti ដែលជាទីតាំងប៉ុស្តិ៍ពាណិជ្ជកម្មព្រំដែនមីយ៉ាន់ម៉ា-ចិន៕
ប្រែសម្រួលដោយ៖ វាសនា
