រដ្ឋាភិបាលបាននិយាយថា ភ្លើងឆេះនៅប្រទេសគុយវ៉ែតបានសម្លាប់មនុស្សចំនួន៤៩ នាក់ជាជនជាតិឥណ្ឌាទាំងអស់ នៅពេលដែលវាបានឆាបឆេះអគារស្នាក់នៅរបស់កម្មករបរទេសជិត ២០០ នាក់កាលពីថ្ងៃពុធម្សិលម៉ិញនេះ។ ក្រសួងសុខាភិបាលបាននិយាយថា អគ្គិភ័យដែលបានឆាបឆេះអគារ៦ជាន់នៅភាគខាងត្បូងទីក្រុងគុយវ៉ែតនៅពេលព្រឹកព្រលឹមនោះ ក៏បានបណ្តាលឲ្យមនុស្សរាប់សិបនាក់រងរបួសផងដែរ។ អណ្តាតភ្លើងបានឆាបឆេះជាន់ខាងក្រោម ខណៈដែលមានផ្សែងខ្មៅហុយចេញពីបង្អួចជាន់ខាងលើ រូបភាពដែលមិនបានបញ្ជាក់ត្រូវបានបង្ហោះនៅលើប្រព័ន្ធផ្សព្វផ្សាយសង្គម។
ក្រសួងមហាផ្ទៃរបស់ប្រទេសនេះបានកែសម្រួលចំនួនអ្នកស្លាប់ពី35នាក់រហូតដល់ 49 នាក់ ដែលបានចេញផ្សាយមុននេះ បន្ទាប់ពីក្រុមធ្វើកោសល្យវិច្ច័យបានរុករកអគារដែលឆេះនោះ។ទីភ្នាក់ងារសារព័ត៌មានគុយវ៉ែតផ្លូវការបានដកស្រង់សម្តីរដ្ឋមន្ត្រីសុខាភិបាល Ahmed al-Awadhi ដោយនិយាយថា មន្ទីរពេទ្យបានទទួលមនុស្សចំនួន ៥៦ នាក់បានរងរបួសក្នុងអគ្គីភ័យនៅក្នុងតំបន់ Mangaf ដែលមានប្រជាជនច្រើនជាមួយពលករចំណាកស្រុក។
ប្រភពពីសមត្ថកិច្ចបានឲ្យដឹងថា ជនរងគ្រោះបានថប់ដង្ហើមដោយសារមានផ្សែងហុយខ្លាំង បន្ទាប់ពីភ្លើងបានឆាបឆេះនៅអគារនោះ។ អ្នកនាំពាក្យក្រសួងការបរទេសឥណ្ឌាបាននិយាយថា រដ្ឋមន្ត្រីការបរទេសឥណ្ឌា Kirti Vardhan Singh ក៏កំពុងធ្វើដំណើរទៅសម្របសម្រួលជំនួយ និងធ្វើមាតុភូមិនិវត្តន៍អ្នកស្លាប់ទាំងនោះផងដែរ៕
ប្រភព៖ A News
ប្រែសម្រួលដោយ៖ វាសនា
