ប្រព័ន្ធផ្សព្វផ្សាយក្នុងប្រទេសអេត្យូពីបានរាយការណ៍កាលពីថ្ងៃចន្ទថា ការបាក់ដីនៅតំបន់ Gondar ភាគខាងជើងនៃតំបន់ Amhara ប្រទេសអេត្យូពី បានឆក់យកជីវិតមនុស្សចំនួន 23 នាក់ និងបានបណ្តាលឲ្យមនុស្ស 8 នាក់ផ្សេងទៀតរងរបួស។ យោងតាមសាជីវកម្ម Fana Broadcasting ដែលគ្រប់គ្រងដោយរដ្ឋ (FBC)បានឱ្យដឹងថា គ្រោះមហន្តរាយនេះបានធ្វើឱ្យមនុស្សចំនួន 2,700 នាក់ផ្លាស់ទីលំនៅ, បំផ្លាញដំណាំចំនួន 1,775 ហិកតា និងខូចខាតផ្ទះចំនួន 48 ខ្នងនៅទូទាំងស្រុកជនបទចំនួន 11 ។
នាយកដ្ឋានទំនាក់ទំនងនៃតំបន់នេះបានប្រកាសថា ក្រុមការងារត្រូវបានបង្កើតឡើង ដើម្បីផ្តល់ជំនួយដល់អ្នកដែលរងផលប៉ះពាល់ដោយការរអិលបាក់ដី។ ឧបទ្ទវហេតុនេះបានកើតឡើងដោយការបាក់ដីមួយទៀតនៅថ្ងៃទី 24 ខែសីហាឆ្នាំ 2024 នៅតំបន់ Abna Kebele នៃស្រុក Tselemti ក្នុងតំបន់ North Tigray ដែលជាកន្លែងដែលមនុស្ស 10 នាក់បានបាត់បង់ជីវិតនិង 6 នាក់ទៀតកំពុងបាត់ខ្លួន។ អាជ្ញាធរក្នុងតំបន់បានប្រកាសអាសន្ន បន្ទាប់ពីមានការព្រមានពីវិទ្យាស្ថានឧតុនិយមអេត្យូពី អំពីការកើនឡើងហានិភ័យនៃការរអិលបាក់ដី ដោយសារការរំពឹងថានឹងមានភ្លៀងធ្លាក់ខ្លាំង។
រដូវវស្សានេះ បាន និងកំពុងបំផ្លិចបំផ្លាញដល់តំបន់ផ្សេងៗនៃប្រទេស ដោយគ្រោះបាក់ដីបានវាយលុកស្រុកជាច្រើននៅភាគខាងជើង និងខាងត្បូង។ កាលពីខែមុន ការបាក់ដីជាប់គ្នានៅក្នុងតំបន់ Gofa នៃតំបន់ភាគខាងត្បូងប្រទេសអេត្យូពីបានឆក់យកជីវិតមនុស្សជិត ២៦០នាក់ និងមនុស្សជាង ១៥.០០០នាក់បានផ្លាស់ទីលំនៅ៕
ប្រភព៖ A News
ប្រែសម្រួលដោយ៖ វាសនា
