យ៉ាងហោចណាស់មនុស្សចំនួន ៨១ នាក់ត្រូវបានសម្លាប់ និងជាច្រើននាក់ទៀតបានបាត់ខ្លួន បន្ទាប់ពីការវាយប្រហារដោយក្រុមភេរវករ Boko Haram ដែលសង្ស័យថា ជាក្រុមភេរវករនៅរដ្ឋ Yobe ភាគឦសាននៃប្រទេសនីហ្សេរីយ៉ា។ លោក Abdulkarim Dungus អ្នកនាំពាក្យប៉ូលីសរដ្ឋ Yobe បាននិយាយថា “ជនសង្ស័យភេរវករ Boko Haram ប្រហែល 150 នាក់ ប្រដាប់ដោយកាំភ្លើងវែង និងគ្រាប់បែកដៃបាញ់ដោយគ្រាប់រ៉ុក្កែត បានវាយប្រហារសង្កាត់ Mafa លើម៉ូតូជាង 50 គ្រឿងកាលពីថ្ងៃអាទិត្យ ។ ពួកគេបានសម្លាប់មនុស្សជាច្រើន និងបានដុតបំផ្លាញហាង និងផ្ទះជាច្រើន។ យើងមិនទាន់អាចបញ្ជាក់បានពីចំនួនពិតប្រាកដនៃអ្នកស្លាប់នៅក្នុងការវាយប្រហារនេះទេ”។
លោក Dungus បាននិយាយថា វាហាក់ដូចជាការវាយប្រហារសងសឹក ចំពោះការសម្លាប់ភេរវករ Boko Haram ពីរនាក់ ដោយសន្តិសុខភូមិ។ Bulama Jalaluddeen មន្ត្រីក្នុងតំបន់បានបន្ថែមថា “តាមតួលេខទាំងនេះ វាត្រូវបានបង្កើតឡើងថា មនុស្សយ៉ាងហោចណាស់ 81 នាក់ត្រូវបានសម្លាប់នៅក្នុងការវាយប្រហារ ។
មនុស្សជាច្រើននៅតែបាត់ខ្លួន ក្រុម Boko Haram និងក្រុមជ្រុលនិយមផ្សេងទៀតបានធ្វើការបះបោររយៈពេល 15 ឆ្នាំមកហើយនៅភាគឦសានប្រទេសនីហ្សេរីយ៉ា ដែលបានសម្លាប់មនុស្សជាង 40,000 នាក់។ ភាគកណ្តាល និងភាគពាយ័ព្យនៃប្រទេសនីហ្សេរីយ៉ាត្រូវបានញាំញីអស់ជាច្រើនឆ្នាំដោយក្រុមឧក្រិដ្ឋជនដែលគេស្គាល់ថា ជា “ចោរ” ដែលវាយឆ្មក់ភូមិ សម្លាប់ និងចាប់ពង្រត់អ្នកស្រុក និងដុតផ្ទះចោលបន្ទាប់ពីប្លន់ពួកគេ៕
ប្រភព៖ A News
ប្រែសម្រួលដោយ៖ វាសនា
