យ៉ាងហោចណាស់មានជនជាតិប៉ាឡេស្ទីន៤០នាក់បានស្លាប់ និងជាច្រើននាក់ផ្សេងទៀតបានរងរបួសកាលពីព្រឹកថ្ងៃអង្គារ ដោយការវាយប្រហារតាមអាកាសរបស់អ៊ីស្រាអែល ទៅលើជំរុំតង់មួយនៅ Khan Younis នៅភាគខាងត្បូង Gaza Strip។
សាក្សីដែលបានឃើញផ្ទាល់ភ្នែកបាននិយាយថា អ៊ីស្រាអែលបានវាយប្រហារតំបន់ Al-Mawasi ដែលជាតំបន់មនុស្សធម៌ដែលបានកំណត់ដោយមីស៊ីលយ៉ាងហោចណាស់បីគ្រាប់។ យ៉ាងហោចណាស់តង់ចំនួន 20 ដែលជនភៀសខ្លួនប៉ាឡេស្ទីនកំពុងស្នាក់នៅត្រូវបានឆេះ។ មន្ត្រីសង្គ្រោះបន្ទាន់ស៊ីវិលនៅតំបន់ហ្គាហ្សាបាននិយាយថា ក្រុមរបស់ពួកគេបានយកអ្នកស្លាប់ និងរបួសចេញពីតំបន់នោះ។ ហើយពួកគេបានព្យាយាមស្វែងរកជនរងគ្រោះដែលអាចត្រូវបានគេកប់។
កងទ័ពអ៊ីស្រាអែលបានអះអាងថា ខ្លួនបានវាយប្រហារទៅលើក្រុមភេរវករ Hamas ដែលកំពុងប្រតិបត្តិការនៅក្នុងមជ្ឈមណ្ឌលបញ្ជា និងគ្រប់គ្រងដែលបង្កប់នៅខាងក្នុងតំបន់មនុស្សធម៌ក្នុងទីក្រុង Khan Younis នោះ ហាម៉ាស់បានបដិសេធការចោទប្រកាន់នេះ ដោយនិយាយថា នេះគឺជាការកុហកច្បាស់លាស់ ដែលមានគោលបំណងបង្ហាញអំពីភាពត្រឹមត្រូវនៃអំពើអាក្រក់ទាំងនេះ។
សង្គ្រាមដែលកំពុងបន្តរបស់អ៊ីស្រាអែលនៅលើតំបន់ហ្គាហ្សាស្ទ្រីប ដែលឥឡូវនេះមានរយៈពេលជិតមួយឆ្នាំមកហើយ ដោយបានសម្លាប់ជនជាតិប៉ាឡេស្ទីនប្រហែល 41,100 នាក់ ដែលភាគច្រើនជាស្ត្រី និងកុមារ និងជិត 94,800 នាក់ផ្សេងទៀតរងរបួស។ នេះបើយោងតាមអាជ្ញាធរសុខាភិបាលក្នុងតំបន់។
ការបន្តបិទតំបន់នេះបាននាំឱ្យមានការខ្វះខាតស្បៀងអាហារ ទឹកស្អាត និងថ្នាំពេទ្យយ៉ាងធ្ងន់ធ្ងរ ដែលធ្វើឱ្យតំបន់ភាគច្រើនខូចខាត។ អ៊ីស្រាអែលប្រឈមមុខនឹងការចោទប្រកាន់ពីបទប្រល័យពូជសាសន៍នៅតុលាការយុត្តិធម៌អន្តរជាតិ ចំពោះសកម្មភាពរបស់ខ្លួននៅតំបន់ហ្គាហ្សា។នេះបើយោងតាម A News ចេញផ្សាយនៅថ្ងៃនេះ៕
ប្រែសម្រួលដោយ៖ វាសនា
