ដោយសារតែភ្លៀងធ្លាក់ខ្លាំងជាប់ៗគ្នាក្នុងរយៈពេលប៉ុន្មានថ្ងៃកន្លងមកនេះបានបង្កជាទឹកជំនន់នៅតំបន់តាឈីលីក ភាគខាងកើតរដ្ឋសានរបស់ប្រទេសមីយ៉ាន់ម៉ា។ជំនន់ទឹកភ្លៀងបានបង្កផលប៉ះពាល់ដល់លំនៅដ្ឋានប្រជាពលរដ្ឋ និងផ្លូវគមនាគមន៍នៅតំបន់នោះយ៉ាងធ្ងន់ធ្ងរ។

បើយោងតាម The Irrawaddy ដែលបានចេញផ្សាយនៅថ្ងៃទី ១១ ខែ កញ្ញា ឆ្នាំ ២០២៤ នេះបានឱ្យដឹងថា ភ្លៀងបានបន្តធ្លាក់ឥតឈប់ឈរចាប់តាំងពីថ្ងៃអាទិត្យរហូតមកដល់ពេលនេះ បណ្តាលឱ្យជន់លិចសង្កាត់នៅតំបន់ទំនាបចំនួនបីនៅ Tachileik ភាគខាងកើតរដ្ឋ Shan របស់មីយ៉ាន់ម៉ា។

ទន្លេ Sai ដែលបង្កើតជាព្រំដែនរវាងប្រទេសចំនួនពីរគឺប្រទេសមីយ៉ាន់ម៉ា និងប្រទេសថៃ បានជន់លិច ដែលបានបង្ខំឱ្យទំនប់វារីអគ្គិសនីនៅសងខាងព្រំដែនបើកទ្វារទឹក។ តាមរូបភាព ដែលគេថតបានពីតំបន់លិចលង់ដោយជំនន់ទឹកភ្លៀងនោះបានបង្ហាញរូបភាពមនុស្សចំនួន ៨នាក់ ជាប់នៅលើដំបូលអគារ ដែលកំពុងរង់ចាំការជួយសង្គ្រោះពីអាជ្ញាធរមូលដ្ឋាន។ឥឡូវនេះ អាជ្ញាធរនៅតំបន់នោះ កំពុងជួយសង្គ្រោះប្រជាពលរដ្ឋដែលជាប់នៅលើផ្ទះសម្បែងរបស់ពួកគេទៅកាន់ទីសុវត្ថិភាព៕

ជំនន់ទឹកភ្លៀងបានបង្កផលប៉ះពាល់យ៉ាងធ្ងន់ធ្ងរនៅតំបន់មួយចំនួន ក្នុងរដ្ឋសាន របស់ប្រទេសមីយ៉ាន់ម៉ា

ប្រែសម្រួលដោយ៖ វាសនា