ប្រមុខការពារជាតិអាមេរិកបាននិយាយថា យោធាសហរដ្ឋអាមេរិកបានទម្លាក់គ្រាប់បែកជាបន្តបន្ទាប់ទៅលើគោលដៅរបស់ក្រុម Houthi ក្នុងប្រទេសយេម៉ែន។ រដ្ឋមន្ត្រីការពារជាតិអាមេរិក លោក Lloyd Austin បាននិយាយកាលពីថ្ងៃពុធម្សិលម៉ិញនេះថា យន្តហោះទម្លាក់គ្រាប់បែក B-2 របស់កងទ័ពអាកាសអាមេរិកបានធ្វើការវាយប្រហារយ៉ាងជាក់លាក់ ប្រឆាំងនឹងទីតាំងផ្ទុកអាវុធក្រោមដីចំនួន 5 នៅក្នុងតំបន់ដែលគ្រប់គ្រងដោយពួក Houthi នៃប្រទេសយេម៉ែន។
លោក Austin បាននិយាយថា ការវាយប្រហារនោះបានកំណត់គោលដៅលើទីតាំងក្រោមដី ដែលប្រើសម្រាប់រក្សាទុកគ្រឿងសព្វាវុធនៃប្រភេទដែលក្រុម Houthis ប្រើដើម្បីកំណត់គោលដៅលើនាវាស៊ីវិល និងយោធាក្នុងតំបន់។ លោក Austin បាននិយាយថា នេះគឺជាការបង្ហាញតែមួយគត់នៃសមត្ថភាពរបស់សហរដ្ឋអាមេរិកក្នុងការកំណត់គោលដៅដែលសត្រូវរបស់យើងព្យាយាមមិនឱ្យទៅដល់ ទោះជាកប់នៅក្រោមដីយ៉ាងជ្រៅ ឬរឹងមាំយ៉ាងណាក៏ដោយ។
ការងាររបស់យន្តហោះទម្លាក់គ្រាប់បែកបំបាំងកាយរយៈចម្ងាយឆ្ងាយ B-2 Spirit របស់កងទ័ពអាកាសអាមេរិក បង្ហាញពីសមត្ថភាពវាយប្រហារសកលរបស់សហរដ្ឋអាមេរិក ដើម្បីចាត់វិធានការប្រឆាំងនឹងគោលដៅទាំងនេះ នៅពេលចាំបាច់ គ្រប់ពេលវេលា គ្រប់ទីកន្លែង៕
ប្រភព៖ Al Jazeera
ប្រែសម្រួលដោយ៖ វាសនា
