ក្រសួងសុខភាពលីបង់បាននិយាយកាលពីថ្ងៃចន្ទម្សិលម៉ិញនេះថាចំនួនអ្នកស្លាប់ពីការវាយលុកដែលកំពុងបន្តរបស់អ៊ីស្រាអែលលើប្រទេសលីបង់ចាប់តាំងពីថ្ងៃទី 8 ខែតុលាឆ្នាំ 2023នោះមក បានកើនឡើងដល់ 2,483 នាក់ហើយរហូតមកដល់ពេលនេះ។ សេចក្តីថ្លែងការណ៍របស់ក្រសួងនេះបាននិយាយថា មនុស្ស 19 នាក់ត្រូវបានសម្លាប់ និង 98 នាក់ផ្សេងទៀតបានរងរបួសនៅក្នុងការវាយប្រហាររបស់អ៊ីស្រាអែលកាលពីថ្ងៃអាទិត្យកន្លងទៅនេះ នៅទូទាំងប្រទេសលីបង់ ដែលបង្កើនចំនួនអ្នករងរបួសរហូតដល់ 11,628នាក់។
ទោះជាយ៉ាងនេះក្តី ចំនួនអ្នកស្លាប់មិនរាប់បញ្ចូលមនុស្ស 24 នាក់ដែលត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែលចាប់តាំងពីព្រឹកថ្ងៃចន្ទ នៅក្នុងតំបន់ផ្សេងៗនៅភាគខាងត្បូង និងភាគខាងកើតប្រទេសលីបង់នោះទេ។ អ៊ីស្រាអែលបានធ្វើយុទ្ធនាការផ្លូវអាកាសដ៏ធំមួយក្នុងប្រទេសលីបង់ប្រឆាំងនឹងអ្វីដែលខ្លួនអះអាងថា ជាគោលដៅរបស់ក្រុមហេសបូឡាចាប់តាំងពីថ្ងៃទី ២៣ ខែកញ្ញា កន្លងទៅនេះ ដោយធ្វើឲ្យមនុស្សជាង ១,៣៤ លាននាក់រត់ភៀសខ្លួន។ យុទ្ធនាការពីលើអាកាស គឺជាការកើនឡើងពីសង្គ្រាមឆ្លងព្រំដែនរយៈពេលមួយឆ្នាំរវាងអ៊ីស្រាអែល និងក្រុមហេសបូឡា ចាប់តាំងពីការចាប់ផ្តើមនៃការវាយលុករបស់ខ្លួនលើតំបន់ហ្គាហ្សាស្ទ្រីប ដែលអ៊ីស្រាអែលបានសម្លាប់មនុស្សជាង 42,600 នាក់ ដែលភាគច្រើនជាស្ត្រី និងកុមារ ចាប់តាំងពីការវាយប្រហាររបស់ក្រុមហាម៉ាសលើកចុងក្រោយ។
ទោះបីជាមានការព្រមានពីអន្តរជាតិថា តំបន់មជ្ឈឹមបូព៌ា ស្ថិតក្នុងមាត់ជ្រោះនៃសង្រ្គាមក្នុងតំបន់ ចំពេលមានការវាយប្រហារឥតឈប់ឈររបស់អ៊ីស្រាអែលលើតំបន់ហ្គាហ្សា និងលីបង់ ដោយពួកគេបានពង្រីកជម្លោះដោយបើកការលុកលុយចូលទៅភាគខាងត្បូងប្រទេសលីបង់ថែមទៀត៕
ប្រភព៖ A News
ប្រែសម្រួលដោយ៖ វាសនា
