ប្រធានាធិបតីកូរ៉េខាងត្បូង លោក Yoon Suk-yeol បានទទួលយកការលាលែងពីតំណែងរបស់រដ្ឋមន្ត្រីការពារជាតិរបស់ប្រទេសនេះ លោក Kim Yong-hyun ហើយបានតែងតាំងឯកអគ្គរដ្ឋទូតរបស់ប្រទេសអារ៉ាប៊ីសាអូឌីត លោក Choi Byung-hyuk ជារដ្ឋមន្ត្រីការពារជាតិថ្មី។ ទីភ្នាក់ងារព័ត៌មាន Yonhap របស់កូរ៉េខាងត្បូងបានរាយការណ៍ថា ការិយាល័យប្រធានាធិបតីបានបញ្ជាក់ពីការតែងតាំងលោក Choi ដែលជាអតីតឧត្តមសេនីយកងទ័ព ជារដ្ឋមន្ត្រីការពារជាតិថ្មីនាថ្ងៃព្រហស្បតិ៍នេះ។

Yonhap បាននិយាយថា លោក Kim បានស្នើទៅប្រធានាធិបតី Yoon ឱ្យប្រកាសច្បាប់អាជ្ញាសឹកកាលពីយប់ថ្ងៃអង្គារ ដែលជាវិធានការមួយដែលត្រូវបានកាត់បន្ថយភ្លាមៗបន្ទាប់ពីសភារបស់ប្រទេសកូរ៉េខាងត្បូងបានបោះឆ្នោតឱ្យ Yoon ផ្លាស់ប្តូរការសម្រេចចិត្តរបស់គាត់។ ការតែងតាំងរដ្ឋមន្ត្រីការពារជាតិថ្មីរបស់លោក Yoon គឺជាទង្វើផ្លូវការដំបូងរបស់លោកចាប់តាំងពីការលុបចោលការប្រកាសច្បាប់អាជ្ញាសឹកនៅព្រឹកព្រលឹមថ្ងៃពុធ។ទាហានកូរ៉េខាងត្បូងរាប់រយនាក់បានសម្រុកចូលក្នុងបរិវេណរដ្ឋសភាក្នុងទីក្រុងសេអ៊ូលមួយរយៈពេលខ្លី ត្រឡប់ទៅបន្ទាយរបស់ពួកគេវិញ។ ចំពេលមានការខឹងសម្បារជាសាធារណៈចំពោះការប៉ុនប៉ងដាក់ច្បាប់អាជ្ញាសឹក និងការថ្កោលទោសលោក Yoon ដោយគណបក្សប្រឆាំង សភារបស់ប្រទេសកូរ៉េខាងត្បូងបានណែនាំចលនាមួយ នាព្រឹកថ្ងៃព្រហស្បតិ៍ ដើម្បីចោទប្រកាន់ប្រធានាធិបតី។

ប៉ូលីសកូរ៉េខាងត្បូងក៏បានប្រកាសនាថ្ងៃព្រហស្បតិ៍នេះថា ពួកគេកំពុងស៊ើបអង្កេត Yoon សម្រាប់ “ការបះបោរ” ដែលជាឧក្រិដ្ឋកម្មដែលហួសពីអភ័យឯកសិទ្ធិប្រធានាធិបតី និងអាចអនុវត្តទោសប្រហារជីវិត បន្ទាប់ពីក្រុមប្រឆាំងបានដាក់ពាក្យបណ្តឹងប្រឆាំងនឹងគាត់ និងឥស្សរជនសំខាន់ៗផ្សេងទៀតដែលពាក់ព័ន្ធ។

វិបត្តិនៅកូរ៉េខាងត្បូងបានលាតត្រដាងនៅពេលដែលសន្ធិសញ្ញាការពារគ្នារវាងកូរ៉េខាងជើង និងរុស្ស៊ីចូលជាធរមាន។ ប្រព័ន្ធផ្សព្វផ្សាយរដ្ឋកូរ៉េខាងជើងបាននិយាយនៅថ្ងៃព្រហស្បតិ៍នេះថា សន្ធិសញ្ញាភាពជាដៃគូយុទ្ធសាស្ត្រគ្រប់ជ្រុងជ្រោយ ដែលត្រូវបានចុះហត្ថលេខាកាលពីខែមិថុនា រវាងប្រធានាធិបតីរុស្ស៊ី លោក វ្ល៉ាឌីមៀ ពូទីន និងមេដឹកនាំកូរ៉េខាងជើង លោក គីម ជុងអ៊ុន បានចូលជាធរមានកាលពីថ្ងៃពុធ។ កិច្ចព្រមព្រៀងនេះរួមបញ្ចូលទាំងកតិកាសញ្ញាការពារទៅវិញទៅមកសម្រាប់ជំនួយយោធាភ្លាមៗ ប្រសិនបើរុស្ស៊ី ឬកូរ៉េខាងជើងប្រឈមមុខនឹងការឈ្លានពានប្រដាប់អាវុធ។ លោក Chung Jin-suk អគ្គសេនាធិការរបស់ Yoon បាននិយាយថា លោក Choi គឺជាជម្រើសដ៏ស័ក្តិសមសម្រាប់តួនាទីជារដ្ឋមន្ត្រីការពារជាតិថ្មី ខណៈដែលលោកជាឧត្តមសេនីយយោធាផ្កាយបួនចូលនិវត្តន៍ ដែលបានបម្រើការជាមេបញ្ជាការរងនៃបញ្ជាការកងកម្លាំងចម្រុះកូរ៉េខាងត្បូង-សហរដ្ឋអាមេរិក ពី 2019 ដល់ 2020។ លោកបានពណ៌នាលោក Choi ថា ជារដ្ឋមន្ត្រីការពារជាតិដែលនឹង “បំពេញនូវទំនួលខុសត្រូវស្នូលរបស់យោធា រួមទាំងការរក្សាជំហរត្រៀមខ្លួនយ៉ាងម៉ឺងម៉ាត់ដោយផ្អែកលើសម្ព័ន្ធភាពកូរ៉េខាងត្បូង-អាមេរិកដ៏រឹងមាំ”៕

ប្រែសម្រួលដោយ៖ វាសនា