របប Bashar al-Assad ដែលដួលរលំរបស់ប្រទេសស៊ីរី បានបញ្ជូនសាច់ប្រាក់ប្រមាណជា ២៥០លានដុល្លារទៅកាន់ទីក្រុងមូស្គូចន្លោះឆ្នាំ ២០១៨ និង ២០១៩ ចំពេលមានការកើនឡើងនៃទណ្ឌកម្មរបស់លោកខាងលិច និងការបង្កើនការពឹងផ្អែកផ្នែកហិរញ្ញវត្ថុយ៉ាងជ្រាលជ្រៅលើរុស្ស៊ីសម្រាប់ការគាំទ្រផ្នែកយោធា និងសេដ្ឋកិច្ច។ នេះបើយោងតាមកំណត់ត្រាដែលបានរកឃើញដោយ Financial Times ។ ឯកសារដែលទទួលបានដោយសារព័ត៌មានប្រចាំថ្ងៃរបស់អង់គ្លេសបង្ហាញថា ធនាគារកណ្តាលរបស់ប្រទេសស៊ីរីបានដឹកជញ្ជូនប្រាក់ដុល្លារ និងប្រាក់អឺរ៉ូដែលមានទម្ងន់ជិតពីរតោនទៅកាន់អាកាសយានដ្ឋាន Vnukovo នៃទីក្រុងម៉ូស្គូ។មូលនិធិទាំងនេះត្រូវបានបញ្ចូលទៅក្នុងធនាគាររុស្ស៊ីដែលត្រូវបានដាក់ទណ្ឌកម្មដោយសហរដ្ឋអាមេរិក។ ការផ្ទេរនេះបានកើតឡើងកំឡុងពេលដែលប្រទេសស៊ីរីកំពុងតស៊ូជាមួយនឹងទុនបំរុងបរទេសដែលបាត់បង់នោះ ពឹងផ្អែកយ៉ាងខ្លាំងលើការគាំទ្រផ្នែកយោធារបស់រុស្ស៊ី រួមទាំងការគាំទ្រពីក្រុម Wagner ។
លោក David Schenker អតីតឧបការីរដ្ឋមន្ត្រីក្រសួងការបរទេសសហរដ្ឋអាមេរិកទទួលបន្ទុកកិច្ចការភាគខាងកើតបាននិយាយថា របបនេះនឹងត្រូវនាំយកប្រាក់របស់ពួកគេទៅក្រៅប្រទេសទៅកាន់ទីជម្រកសុវត្ថិភាព ដើម្បីអាចប្រើប្រាស់វាដើម្បីទទួលបានជីវិតដ៏ល្អ… សាច់ប្រាក់ស៊ីរីត្រូវបានប្រើប្រាស់សម្រាប់គោលបំណងផ្សេងៗ រួមទាំងការទូទាត់សម្រាប់ស្រូវសាលី ការចំណាយលើយោធា និងសេវាកម្មបោះពុម្ពប្រាក់នៅក្នុងប្រទេសរុស្ស៊ី។ ប្រភពដែលស្គាល់ប្រតិបត្តិការនោះបានកត់សម្គាល់ថា៖ នៅពេលដែលប្រទេសមួយត្រូវបានហ៊ុមព័ទ្ធទាំងស្រុង និងមានទណ្ឌកម្ម ពួកគេមានតែសាច់ប្រាក់ប៉ុណ្ណោះ។
ការស៊ើបអង្កេតរបស់ Financial Times ក៏បានគូសបញ្ជាក់ពីរបៀបដែលក្រុមគ្រួសារ និងសហការីរបស់លោក Assad ផ្លាស់ទីទ្រព្យសម្បត្តិទៅប្រទេសរុស្ស៊ី។ ចាប់តាំងពីឆ្នាំ 2013 សាច់ញាតិរបស់លោក Assad បានទិញផ្ទះល្វែងប្រណីតយ៉ាងហោចណាស់ 20 នៅទីក្រុងម៉ូស្គូ ដោយប្រើការរៀបចំហិរញ្ញវត្ថុដ៏ស្មុគស្មាញ។ លោក Eyad Hamid អ្នកស្រាវជ្រាវជាន់ខ្ពស់នៃកម្មវិធីអភិវឌ្ឍន៍ផ្នែកច្បាប់ស៊ីរីបាននិយាយថា ប្រទេសរុស្ស៊ីគឺជាជម្រកសម្រាប់ហិរញ្ញវត្ថុរបស់របបលោក Assad អស់រយៈពេលជាច្រើនឆ្នាំ។
មន្ត្រីអាមេរិកបានចោទប្រកាន់របបរបស់លោក Assad ពីបទពុករលួយរីករាលដាល និងសកម្មភាពឧក្រិដ្ឋកម្ម ដើម្បីផ្តល់ហិរញ្ញប្បទានដល់កិច្ចខិតខំប្រឹងប្រែងធ្វើសង្គ្រាមរបស់ខ្លួន។ រតនាគារសហរដ្ឋអាមេរិកបានដាក់ទណ្ឌកម្មអង្គភាពស៊ីរី និងរុស្ស៊ីជាច្រើនដែលពាក់ព័ន្ធនឹងការសម្របសម្រួលការផ្ទេរសាច់ប្រាក់ទាំងនេះ។ Malik al-Abdeh អ្នកវិភាគស៊ីរីបានកត់សម្គាល់ថា រដ្ឋស៊ីរីអាចបង់ថ្លៃរដ្ឋរុស្ស៊ីសម្រាប់អន្តរាគមន៍យោធា ។
លោក Assad ដែលគ្រប់គ្រងប្រទេសស៊ីរីដោយកណ្តាប់ដៃដែកអស់រយៈពេលជិត 25ឆ្នាំបន្តពីឪពុកមកនោះបានភៀសខ្លួនទៅកាន់ប្រទេសរុស្ស៊ីកាលពីថ្ងៃទី 8 ខែធ្នូ បន្ទាប់ពីក្រុមប្រឆាំងរបបគ្រប់គ្រងបានដណ្តើមកាន់កាប់ទីក្រុង Damascus ។ ការកាន់កាប់នេះបានធ្វើឡើងបន្ទាប់ពីអ្នកប្រយុទ្ធ Hayat Tahrir al-Sham (HTS) បានចាប់យកទីក្រុងសំខាន់ៗនៅទូទាំងប្រទេសក្នុងការវាយលុកដែលមានរយៈពេលតែជាងពីរសប្តាហ៍ប៉ុណ្ណោះ៕
ប្រភព៖ A News
ប្រែសម្រួលដោយ៖ វាសនា
