ភ្នំពេញ៖ បើមើលតាមការវិភាគរបស់អ្នកគាំទ្រ និងកីឡាករមួយចំនួនដែលជាមិត្តរួមអាជីពជាមួយគ្នា ហាក់បីដូចជាពិបាកទស្សទាយថាតើកីឡាករជើងខ្លាំងរូបណា នឹងក្លាយជាម្ចាស់ខ្សែក្រវ៉ាត់ Dragon Kun Khmer នៅក្នុងព្រឹត្តិការណ៍ប្រកួតដ៏អស្ចារ្យនាចុងខែមីនានេះ។
បេក្ខភាពកីឡាករជើងខ្លាំង៤រូប ដែលនឹងត្រូវមកតតាំងដណ្តើមយកខ្សែរក្រវ៉ាត់4 MEN TOURNAMENT ក្នុងកម្មវិធី Dragon Kunkhmer នោះរួមមាន៖ កីឡាករអេស្បាញ KEWIN MARTINEZ ដែលធ្លាប់យកឈ្នះកីឡាករគុនខ្មែរយើង ២រូបនៅក្រៅប្រទេសជាបេក្ខភាពខ្សែក្រវាត់ម៉ារ៉ាតុនទី១ ខណៈកីឡាករអាហ្វកានីស្ថាន YASIN ជាបេក្ខភាពទី ២ រីឯបេក្ខភាពទី៣ គឺកីឡាករគុនខ្មែរ គឿម សុវណ្ណឃីម និងបេក្ខភាពទី៤ គឺកីឡាករគុនខ្មែរសែន រ៉ាដេត។
កីឡាករជើងខ្លាំងទាំងបួនរូបនេះត្រូវបានអ្នកគាំទ្រចាត់ទុកថា ជាអ្នកមានអាវុធពិសេសរៀងៗខ្លួន ហើយបើយោងតាម បទពិសោធន៍ធ្លាប់ទស្សនាការប្រកួតរបស់អ្នកទាំងបួនរូបនេះកន្លងមក គឺមិនធម្មតាឡើយ សុទ្ធតែជាកីឡាករខ្លាំងដូចគ្នា។
ដូច្នេះគេជឿជាក់ថា ការប្រកួតដណ្ដើមខ្សែក្រវ៉ាត់លើកនេះ ប្រាកដជាមានភាពតានតឹងនឹងធ្វើឲ្យអ្នកគាំទ្រពិបាកជ្រើសរើសរកអ្នកខ្លាំងពិតប្រាកដណាស់ មានតែរង់ចាំទស្សនាព្រឹត្តិការណ៍ប្រកួតជាក់ស្ដែងទាំងអស់គ្នាបងប្អូន។
សូម្បីតែកីឡាករមួយចំនួន ដែលបានផ្ដល់កិច្ចសម្ភាសន៍មកកាន់ក្រុមការងារ Town News ក៏ពិបាកក្នុងការវិភាគដែរ អ្នកខ្លះយល់ថា កីឡាករសែន រ៉ាដេត អាចនឹងមានឱកាសខ្ពស់ ព្រោះជាកីឡាករជើងចាស់ មានបទពិសោធន៍ច្រើន បច្ចុប្បន្នក៏បង្ហាញខ្លួនយ៉ាងល្អដែរ។ អ្នកខ្លះក៏យល់ថា កីឡាករយ៉ាស៊ីន ដែលជាសិស្សរបស់លោកគ្រូសេន ប៊ុនថេន ក៏មិនធម្មតាដែរ ដ្បិតសែន រ៉ាដេត កន្លងមក ក៏ពិបាកទប់ជាមួយកីឡាកររូបនេះដែរ។ ចំណែកឯគឿម សុវណ្ណឃីមវិញ ក៏មិនអាចមើលរំលង ដោយគេជាកីឡាករមានអាវុធមុតស្រួច ទាំងកម្លាំងស៊ុស ការប្រើប្រាស់កណ្ដាប់ដៃ ច្បាស់ល្អ ។ ចំណែកឯកីឡាករប្រេស៊ីលវិញ អ្នកគាំទ្រភាគច្រើនប្រាកដជាបានស្គាល់កិត្តិនាមកីឡាកររូបនេះច្បាស់ណាស់ ក្រោយពីគេបានយកឈ្នះទៅលើកីឡាករជើងខ្លាំងគុនខ្មែររបស់យើងរហូតដល់ទៅ២រូប ក្នុងការប្រកួតយ៉ាងតានតឹងនាពេលកន្លងមក។
ដូច្នេះកុំឲ្យការប្រកួតដ៏កក្រើកនេះកន្លងផុតទៅដោយមិនបានទស្សនាផ្ទាល់ឱ្យសោះបងប្អូន ជួបគ្នាក្នុងការប្រកួតនៅថ្ងៃទី30 ខែមីនា ឆ្នាំ២០២៥ កម្មវិធីចាប់ពីម៉ោង ៨យប់តទៅ ទីតាំងរៀបចំសង្វៀន នៅតាមបណ្តោយផ្លូវជាតិលេខ1 ភូមិ ជ័យឧត្តម១ ឃុំ សំរោងធំ ស្រុកកៀនស្វាយ ខេត្ត កណ្តាល។ជាមួយគ្នានោះ ក៏មានការផ្សាយផ្ទាល់នៅលើកញ្ចក់ទូរទស្សន៍ TOWN FULL HDTV,នៅលើហ្វេសប៊ុកផេក TOWN FULL HDTV, TOWN FM 102.25 និង DRAGON BEERផងដែរ៕
ដោយ៖ វិកគី
