ភ្នំពេញ៖ មកវិញសប្តាហ៍នេះ ជើងខ្លាំងគុនខ្មែរជាច្រើនរូបត្រូវសម្លៀងអាវុធចាំតតាំងជាមួយអ្នកលេងក្បាច់គុនមកពីបរទេសជាច្រើនរូប ដែលបច្ចុប្បន្នមានកីឡាករខ្លះបានធ្វើដំណើរមកដល់ប្រទេសកម្ពុជារួចរាល់ហើយ ត្រៀមចាំតែដល់ថ្ងៃប្រកួតតែប៉ុណ្ណោះ ចាំមើលៗកីឡាករគុនខ្មែរម្ចាស់ផ្ទះយើងអាចទប់បានដែរឬយ៉ាងណា បើកីឡាករបរទេសទាំងនោះសុទ្ធតែជាជើងខ្លាំងនៅលើសង្វៀនបែបនេះ។

ចំណែកឯម្ចាស់ផ្ទះគុនខ្មែរយើង ក៏មិនធម្មតាដែរ បច្ចុប្បន្នកំពុងតែសម្ងំហ្វឹកហាត់សំលៀងអាវុធត្រៀមស្វាគមន៍ភ្ញៀវឆ្លងដែនមកពីក្រៅប្រទេសដូចគ្នា។

អ្វីដែលកាន់តែកក្រើក និងកាន់តែអស្ចារ្យជាមួយទស្សនីយភាពប្រដាល់ដ៏ជក់ចិត្តនៅលើសង្វៀនទៀតនោះ DRAGON KUN KHMER សហការជាមួយស្ថានីយទូរទស្សន៍ TOWN FULL HDTV រៀបចំឱ្យមានការប្រកួត 4 MEN TOURNAMENT (63.5Kg)គឺមានកីឡាករ

រិទ្ធ ភារម្យ,  រៀម រ៉ង, កូស៊ីន គុនខ្មែរ និងសឹង្ហ ឡេង អ្នកលេងជើងខ្លាំងគុនខ្មែរទាំង ៤រូបនេះ នឹងឡើងល្បងកណ្ដាប់ដៃ ប្ដូរអាវុធគ្នានៅលើសង្វៀនដ៏មានប្រជាប្រិយភាពរបស់ថោន DRAGON KUN KHMER ។

បន្ថែមពីលើនេះ ក៏មានការប្រកួតគូមិត្តភាពអន្តរជាតិគុនខ្មែរផងដែរគឺកីឡាករ រដ្ឋា គុនខ្មែរ (ROTHA KUNKHMER)  ជួបតតាំងជាមួយកីឡាករសញ្ជាតិអ៊ីរ៉ងកំពុងពេញឡើងជើង អាមៀរ ចាន់រាជ្យ (AMIR CHANREACH),ជិន ចាង (CHIN JANG) ត្រូវជួបប្ដូរកណ្ដាប់ដៃជាមួយអ្នកលេងជើងខ្លាំងមកពីប្រទេស នីដឺឡែន អែក វេរើប (IKE VERRIPS),នី វីរ៉ាផា (NY VIRAPHA) ត្រូវប៉ះអ្នកលេងអាវុធក្បាច់គុនជើងខ្លាំងមួយរូបទៀតមកពីប្រទេសអ៊ីរ៉ង់ ម៉ូហាម៉េត ចាន់រាជ (MOHAMMAD CHANREACH),សូត្រ ខេវិន (SOTH KHEVIN) មកលេងកណ្ដាប់ដៃ និងរន្ទះជើងជាមួយអ្នកលេងអាវុធមកពីប្រទេស អាហ្វ្រិកខាងត្បូង ធិម៉ូធី ស្ទីនកាំ (TIMOTHY STEENKAMP) ។

ដឹងតែកក្រើកទៀតហើយ សម្រាប់ការប្រកួតថ្ងៃទី ១ ដែលត្រូវនឹងថ្ងៃទី ១០ ខែឧសភា ឆ្នាំ ២០២៥ កម្មវិធីចាប់ផ្តើមពីម៉ោង 8យប់តទៅ។ទីតាំងរៀបចំសង្វៀនប្រកួត នៅភូមិក្បាលដំរី២ (ព្រៃទា)សង្កាត់កាកាប២ ខណ្ឌពោធិសែនជ័យ រាជធានីភ្នំពេញ។ជាមួយគ្នានោះ ក៏មានការផ្សាយផ្ទាល់នៅលើកញ្ចក់ទូរទស្សន៍ TOWN FULL HDTV,ហ្វេសប៊ុកផេក TOWN FULL HDTV, TOWN FM 102.25, TOWN SPORTS និង DRAGON BEER ផងដែរ៕

ដោយ៖ វិកគី