ភ្នំពេញ៖ បុរសម្នាក់បានស្លាប់ភ្លាមៗនៅកន្លែងកើតហេតុ ដោយសារបើកប៉ះជាមួយរថយន្តមួយគ្រឿងបណ្តាលដួល ហើយត្រូវរថយន្តមួយគ្រឿងទៀតជាន់ហ្រ្វាំងមិនទាន់ក៏បានជ្រុលមកបុកម៉ូតូ និងកិនជនរងគ្រោះបណ្តាលឲ្យដាច់ខ្លួនជាពីរកំណាត់ស្លាប់ភ្លាមៗនៅនឹងកន្លែងកើតហេតុ ។ហេតុការណ៍នេះ បង្កឲ្យមានការភ្ញាក់ផ្អើលឡើងកាលពីម៉ោង 3នឹង៤០នាទីរសៀលថ្ងៃទី០១ ខែមិថុនា ឆ្នាំ២០២៥ នៅតាមបណ្តោយមហាវិថីឈ្នះឈ្នះ ទល់មុខ មន្ទីរពេទ្យជាតិ តេជោសន្តិភាព ស្ថិតនៅសង្កាត់គោករការ ខណ្ឌព្រែកព្នៅ រាជធានីភ្នំពេញ ។
សមត្ថកិច្ចបានឲ្យដឹងសពជនរងគ្រោះមាន ឈ្មោះកេន ឌី អាយុ១៨មុខរបរកម្មករសំណង់ស្នាក់នៅការដ្ឋានសំណង់ ស្ថិតនៅសង្កាត់គោករការ ខណ្ឌព្រែកព្នៅ រាជធានីភ្នំពេញ មានស្រុកកំណើតនៅភូមិរវាំងជំ ឃុំរោងដំរី ស្រុកបាភ្នំខេត្តព្រៃវែង ។
ប្រភពព័ត៌មានពីកន្លែងកើតហេតុបាននិយាយប្រាប់ថា នៅមុនពេលកើតហេតុ គេឃើញជនរងគ្រោះជិះម៉ូតូមួយគ្រឿងម៉ាកធូដេពណ៌ផ្ទៃមេឃ ពាក់ស្លាកលេខ ភ្នំពេញ1FN-6767ធ្វើដំណើរតាមបណ្ដោយ មហាវិថីឈ្នះឈ្នះ ក្នុងទិសដៅពីលិចទៅកើត ហើយក៏បានប៉ះជាមួយរថយន្តមួយគ្រឿង មិនចាំម៉ាកបណ្តាលឲ្យដួល ហើយត្រូវរថយន្តកុងតឺន័រម៉ាកហ៊ីយ៉ាន់ដាយពណ៌សលាយខៀវ ពាក់ស្លាកលេខ ភ្នំពេញ3C-0094ដែលបើកពីក្រោយជាន់ហ្រ្វាំងមិនជាប់ក៏ជ្រុលទៅបុកកិនជនរងគ្រោះចំពាក់កណ្តាលបណ្តាលឲ្យដាច់ខ្លួនជាពីរស្លាប់ភ្លាមៗនៅកន្លែងកើតហេតុ។
បើតាមប្រភពព័ត៌មានពីកន្លែងកើតហេតុបានបន្តទៀតថា ខណៈគ្រោះថ្នាក់ភ្លាមៗ រថយន្តដែលប៉ះជាមួយម៉ូតូជនរងគ្រោះ ដំបូងបានបើកគេចខ្លួនទៅបាត់ ចំណែកអ្នកបើកបរ រថយន្តដែលបើកកិនជនរងគ្រោះដោយថាខ្លួនមិនខុស មិនព្រមរត់ ត្រូវបានកំលាំងសមត្ថកិច្ចនគរបាលឃាត់ខ្លួន ប្រគល់ទៅផ្នែកជំនាញផងដែរ ។
បន្ទាប់ពីកើតហេតុ សមត្ថកិច្ចនគរបាលប៉ុស្តិ៍បានទាក់ទងទៅសមត្ថកិច្ចជំនាញនៃការរិយាល័យចរាចរណ៍ផ្លូវគោករាជធានីចុះមកវាស់វែង យកម៉ូតូជនរងគ្រោះ ព្រមទាំងរថយន្តទៅរក្សាទុកដើម្បីរងចាំការដោះស្រាយនៅពេលក្រោយ។ ចំណែកសពត្រូវបានកំលាំងសមត្ថកិច្ចនគរបាលជំនាញធ្វើកំណត់ហេតុប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ៕
ដោយ៖ វិសាល
