ភ្នំពេញ៖ បុរសម្នាក់បានស្លាប់ភ្លាមៗនៅកន្លែងកើតហេតុ និងម្នាក់ទៀតបានរងរបួសធ្ងន់ត្រូវបានរថយន្តកងសង្គ្រោះបន្ទាន់៧១១ កងពលតូចលេខ៧០ដឹកយកទៅមន្ទីរពេទ្យភ្លាមៗ ក្រោយជួបគ្រោះថ្នាក់ចរាចរណ៍ជិះម៉ូតូបុករថយន្តពីក្រោយ។ហេតុការណ៍នេះបានកើតឡើង កាលពីម៉ោង៤ និង២០នាទីទាបភ្លឺថ្ងៃទី១៣ ខែមិថុនា ឆ្នាំ២០២៥ នៅផ្លូវវេងស្រេង ភូមិត្រពាំងថ្លឹង សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ។
សមត្ថកិច្ចបានឲ្យដឹងថា ជនរងគ្រោះដែលស្លាប់ឈ្មោះ ស្រាល ជាងអ៊ី អាយុ៣២ឆ្នាំ ទីលំនៅបច្ចុប្បន្ន ភូមិថ្មពេជ្រ ឃុំថ្មពេជ្រ ស្រុកត្បូងឃ្មុំ ខេត្តត្បូងឃ្មុំ ។ ចំណែកម្នាក់ទៀត មិនស្គាល់អត្តសញ្ញាណ (រងរបួសធ្ងន់)បញ្ជូនទៅមន្ទីរពេទ្យ ។
ប្រភពព័ត៌មានបានឲ្យដឹងថា មុនពេលកើតហេតុគេបានឃើញរថយន្តដឹកទឹកកក ម៉ាកគា ពណ៌ខៀវ ពាក់ផ្លាកលេខ ភ្នំពេញ2O-1274 ធ្វើដំណើរតាមបណ្តោយផ្លូវចោមចៅ(វេងស្រេង)ក្នុងទិសដៅពីលិចទៅកើត ខណៈមកដល់ចំណុចកើតហេតុក៏បើកអែបខាងដើម្បីដាក់ទឹកកកឲ្យម៉ូយ ភ្លាមនោះស្រាប់តែមានម៉ូតូហុងដាស្កូបពី ពណ៌ស ពាក់ផ្លាកលេខ ត្បូងឃ្មុំ1N- 0871 ជិះដោយបុរស២នាក់ធ្វើដំណើរមកពីក្រោយលឿនមិនប្រយ័ត្នក៏ជ្រុលទៅបុករថយន្តពីក្រោយពេញទំហឹងបណ្តាលឲ្យអ្នកជិះម៉ូតូស្លាប់ម្នាក់រងរបួសធ្ងន់ម្នាក់។
បន្ទាប់ពីកើតហេតុជនរងគ្រោះដែលរងរបួសត្រូវបានរថយន្តសង្គ្រោះរបស់អង្គភាព៧១១ កងពលតូចលេខ៧០ ដឹកបញ្ជូនទៅមន្ទីរពេទ្យព្រះកុសុមៈ ចំណែកសពជនរងគ្រោះត្រូវបានសមត្ថកិច្ចទាក់ទងទៅក្រុមគ្រួសារមកទទួលយកទៅធ្វើបុណ្យតាមប្រពៃណី។ ចំណែករថយន្តនឹងម៉ូតូសមត្ថកិច្ចវាស់វែងយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំដោះស្រាយពេលក្រោយ៕
ដោយ៖វិសាល
