ភ្នំពេញ ៖ ក្រោយពីការចាប់ឃាត់ខ្លួន និងធ្វើការសាកសួរ អតីតពិធីករ លោក ភោ សុផានិត រហូតមកដល់ព្រលប់ ថ្ងៃទី១៧ ខែវិច្ឆិកា ត្រូវបាន លោក វ៉ាន់ សែនវិសុទ្ធ ចៅក្រមស៊ើបសួរ សាលាដំបូងរាជធានីភ្នំពេញ បានសម្រេច មិនឃុំខ្លួនទេ និងបានដោះលែងអោយនៅក្រៅឃុំ ក្រោយដាក់ប្រាក់តម្កល់ធានាសំណង ពាក់ព័ន្ធបទល្មើស ចេញសែកគ្មានប្រាក់ អោយម្ចាស់បំណុល។
សមត្ថកិច្ច ចាប់ខ្លួនអតីតពិធីកររូបនេះ កាលពីយប់ថ្ងៃទី១៦ ខែវិច្ឆិកា ឆ្នាំ២០២០ ធ្វើនៅចំណុចហាងកាហ្វេ អាម៉ាហ្សូន ផ្លូវព្រះមុនីង្ស សង្កាត់ស្រះចក ខណ្ឌដូនពេញ រាជធានីភ្នំពេញ ពីបទមិនបំពេញកាតព្វកិច្ច ចំពោះឧបករណ៍ ដែលអាចជួញដូរបាន (ចេញសែកគ្មានប្រាក់) ប្រព្រឹត្តនៅរាជធានីភ្នំពេញ កាលពីថ្ងៃទី១៦ ខែមិថុនា ឆ្នាំ២០២០ តាមដីកាបង្គាប់ឲ្យនាំខ្លួន លេខ១៣០០ «ឃ១»ដ.ច.ន ចុះថ្ងៃទី ២៩ ខែ កញ្ញា ឆ្នាំ២០២០ ចេញដោយលោក វ៉ាន់ សែនវិសុទ្ធ ចៅក្រមស៊ើបសួរ សាលាដំបូង រាជធានីភ្នំពេញ។
សូមបញ្ជាក់ថា លោក ភោ សុផានិត ភេទប្រុស អាយុ ៤៤ឆ្នាំ មុខរបរ ពាណិជ្ជករ ទីលំនៅបច្ចុប្បន្ន ផ្ទះគ្មានលេខ ផ្លូវបេតុង ភូមិត្រពាំងថ្លឹង សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ៕
