ខេត្តបន្ទាយមានជ័យ ៖ បុរសចិត្តខ្លាំងម្នាក់ បានស្ទុះទៅយកថ្នាំ សម្រាប់សម្លាប់សត្វ ខ្យង មកផឹកបណ្តាលអោយស្លាប់ តាមផ្លូវពេលបញ្ជូនទៅមន្ទីរពេទ្យ ដោយសារតែខឹងប្រពន្ធ យកថ្នាំពេទ្យអោយខ្លួនលេបមិនបាន។ ហេតុការណ៍នេះ កើតឡើងកាលពីម៉ោងជិត១១យប់ កាលពីថ្ងៃទី១៦ ខែធ្នូ ឆ្នាំ២០២០ នៅចំណុចវាលស្រែអាញ៉ាចេត ស្ថិតក្នុងភូមិចក ឃុំរហាត់ទឹក ស្រុកមង្គលបូរី ខេត្តបន្ទាយមានជ័យ។
សមត្ថកិច្ចមូលដ្ឋាន បានឲ្យដឹងថា បុរសខាងលើឈ្មោះ ព្រិម រ៉ាត់ អាយុ៤០ឆ្នាំ នៅភូមិចកកើត ឃុំរហាត់ទឹក ស្រុកមង្គលបូរី ខេត្តបន្ទាយមានជ័យ។ ហើយនៅមុនពេលកើតហេតុ ជនរងគ្រោះរួមទាំងមិត្ត ២ទៅ៣នាក់ផ្សេងទៀត បាននាំគ្នាផឹកស៊ី នៅពេលស្រវឹងជនរងគ្រោះបាន ត្រឡប់ទៅខ្ទមស្រែរបស់ខ្លួន បានឲ្យប្រពន្ធរកថ្នាំឲ្យខ្លួនលេបនៅពេលនោះ គាត់ថាមិនមានថ្នាំលេបទេ បន្ទាប់មកប្តីគាត់និយាយថា ខ្ញុំទៅយកផឹកថ្នាំខ្យងសម្លាប់សត្វល្អិតមកផឹកនិយាយភ្លាមឃើញប្តីគាត់យកថ្នាំខ្យងលើកមកផឹក បណ្តាលឲ្យពុលស្របពេលនោះប្រពន្ធ បានដឹកយកមកសង្គ្រោះនៅមន្ទីរពេទ្យ ទើបបានពាក់កណ្តាលផ្លូវ ក៏ដាច់ខ្យល់ស្លាប់។
សូមបញ្ជាក់ថា នេះជាលើកទី២ហើយ ដោយលើកទី១ បានផឹកថ្នាំបាញ់ស្មៅម្តងមកហើយតែជួយសង្គ្រោះបានទាន់ពេល លើកទី២នេះ ផឹកថ្នាំខ្យងប្រពន្ធព្យាយាមជួយសង្គ្រោះដែរតែមិនអាចជួយបាន បណ្តាលអោយស្លាប់ តាមផ្លូវពេលបញ្ជូនទៅមន្ទីរពេទ្យ៕
