ភ្នំពេញ ៖ ឯកឧត្តម ឃួង ស្រេង អភិបាលរាជធានីភ្នំពេញ បានថ្លែងឱ្យដឹងនាពេលកន្លងមកថា ៖ តាមគម្រោងផ្សារបោះដុំ បន្លែ ផ្លែឈើ ថ្មី ដែលកំពុងសាងសង់ នៅជាប់តាមបណ្តោយ មហាវិថីឈ្នះឈ្នះ នឹងត្រូវបើកដំណើរការ លក់ដូរ នៅក្នុងឆ្នាំ២០២២ តែដោយសារវិបត្តិកូវីដ អាចធ្វើឱ្យយឺតជាងការ គ្រោងទុកបន្តិច។ ផ្សារបន្លែ ផ្លែឈើ បោះដុំ កំពុងសាងសង់ នៅជាប់តាម បណ្តោយមហាវិថី ឈ្នះ ឈ្នះ លើផ្ទៃដីចំនួន ២០ ហិកតា នៅមាត់បឹងតាមោក (កប់ស្រូវ) នឹងបើកឱ្យដំណើរ នៅក្នុងឆ្នាំ២០២២។
ឯកឧត្តម អភិបាលរាជធានីភ្នំពេញ បន្តថា នៅពេលផ្សារនេះ ដំណើរការ រថយន្តដឹកបន្លែផ្លែឈើ មកពីតាមខេត្ត ត្រូវចូលចត និងបែងចែកបន្លែផ្លែឈើ ពីផ្សារនេះ ទៅកន្លែងផ្សេងទៀត ដោយមិនចាំបាច់ ចូលដល់លើផ្លូវ នៅផ្សារនាគមាស និងផ្សារដើមគរ ទៀតឡើយ។
រដ្ឋបាលរាជធានីភ្នំពេញ បង្កើតផ្សារបន្លែផ្លែឈើ បោះដុំនេះឡើង ក្នុងបំណងកាត់បន្ថយ រថយន្តធំ ចូលដល់កណ្តាលក្រុង និងបញ្ចប់ការលក់ដូរ បន្លែផ្លែឈើ បោះដុំ នៅលើផ្លូវនានា ដែលនាំទៅដល់ការកកស្ទះចរាចរ និងគ្រោះថ្នាក់ចរាចរ។ ផ្សារដើមគរ និងផ្សារនាគមាស សព្វថ្ងៃ ជាកន្លែងដឹកចូល និងដឹកចេញបន្លែផ្លែឈើ មក និងទៅគ្រប់ទិសទី៕