ភ្នំពេញ ៖ ប្រូហ្វាល់ ហ្វេសបុក មួយ ឈ្មោះ ប្អូន ប៉ែល បានបង្ហោះរូបភាពអាវុធទំនើបៗជាច្រើនដើម ដែលតាមរូបភាពនេះ អាចសន្និដ្ឋានបានថា ជាករណីផ្សព្វផ្សាយក្នុងបំណងរកអតិថិជនទិញ-លក់អាវុធទាំងនេះផង សមត្ថកិច្ចបានបើកការស៊ើបអង្កេត និងបានចុះទៅឆែកឆេរដល់ផ្ទះ ស្រាប់តែប្រទះឃើញ គ្រឿងជាច្រើនកញ្ចប់ថែមទៀត ហើយមនុស្ស៣នាក់ ត្រូវបានឃាត់ខ្លួន កាលពីរសៀលថ្ងៃទី២៩ ខែធ្នូ ឆ្នាំ២០២០ នៅចំណុចភូមិឆ្កែកូន ឃុំបន្សាយត្រែង ស្រុកថ្មគោល ខេត្តបាត់ដំបង។
កិច្ចប្រតិបត្តិការនេះ នគរបាលឃាត់ខ្លួនមនុស្សចំនួន០៣នាក់រួមមាន៖ ១. ឈ្មោះ ហឿន ប៉ែល ភេទប្រុស អាយុ៣៨ឆ្នាំ ២. ឈ្មោះ យ៉ូន វិឆ័យ ភេទប្រុស អាយុ១៥ឆ្នាំ និង ៣. ឈ្មោះ គឿន កេត ភេទស្រី អាយុ២៥ឆ្នាំ អ្នកទាំង៣ រស់នៅ ភូមិឆ្កែកូន ឃុំគោកឃ្មុំ ស្រុកថ្មគោល ខេត្តបាត់ដំបង។ វត្ថុតាងចាប់យកបានរួមមាន៖ ១. កាំភ្លើងខ្យល់បាញ់គ្រាប់សំណមួយដើមនិងគ្រាប់សំណចំនួន៤០០គ្រាប់ ២. ស្នប់សម្រាប់សប់កាំភ្លើងចំនួន០១ ៣. ថ្នាំញៀនប្រភេទម៉ាទឹកកកចំនួន៣០ថង់ទម្ងន់៨,៨០ក្រាម ៤. ទូរស័ព្ទចំនួន០២គ្រឿង ៥. ថង់សម្រាប់ច្រកគ្រឿងញៀនមួយចំនួន ៦. ដែកកេះចំនួន២០ ៧-ប្រាក់ រៀល ដុល្លារ បាតមួយចំនួន។
ម្ចាស់គណនី ដែលមានឈ្មោះ ហឿន ប៉ែលបានយកអាវុធនេះ មកបង្ហាញសមត្ថកិច្ចបានឃើញនិងបញ្ជាក់ថា ខ្លួនទិញមកទុកប្រើប្រាស់បរបាញ់សត្វនិងមានបំណងផ្សព្វផ្សាយលក់ទៅវិញផង ពេលជាមួយនេះសមត្ថកិច្ចប្រទះឃើញ(ថង់ប្លាស្ទិចកិប) មួយចំនួននៅទីនោះ ហើយផ្តើមពីចំណុចនេះសមត្ថកិច្ចបានដាក់ការសង្ស័យទៅលើករណីពាក់ព័ន្ធគ្រឿងញៀនបន្ថែមទៀត។ ទើបឈានដល់ការឆែកឆេរលំនៅឋានខាងលើ ហើយសមត្ថកិច្ចបានរកឃើញម្សៅក្រាមពណ៌ស ដែលសង្ស័យថា ជាថ្នាំញៀនប្រភេទមេតំហ្វេតាមីន ម៉ាទឹកកក ICE រួមទាំងសម្ភារៈមួយចំនួនដូចខាងលើ៕
