ស្ទឹងត្រែង ៖ មនុស្សស្រី៤នាក់ ជិះម៉ូតូមួយគ្រឿង ដោយសារតែការធ្វេសប្រហែស បើកឆ្លងផ្លូវមិនប្រយ័ត្ន ត្រូវរថយន្ត មួយគ្រឿង បុក បណ្តាល ស្ត្រីម្នាក់ និងកុមារីម្នាក់ បានស្លាប់ នៅនឹងកន្លែងកើតហេតុ និងស្ត្រីពីរនាក់ទៀត រងរបួសធ្ងន់ កាលពីរសៀលថ្ងៃទី៤ ខែមករា ឆ្នាំ២០២១ នៅត្រង់ផ្លូវបំបែកជាបួន ស្ថិតក្នុងភូមិស្ពានថ្ម សង្កាត់ស្ទឹងត្រែង ក្រុងស្ទឹងត្រែង។
ប៉ូលិសចរាចរណ៍ក្រុងស្ទឹងត្រែង បានឱ្យដឹងថា ៖ ជនរងគ្រោះទាំង២នាក់ ដែលបានស្លាប់ មានឈ្មោះ ស្រី ឡៃ អាយុ៣១ឆ្នាំ មានលំនៅ នៅភូមិជានុកូល សង្កាត់ស្ទឹងត្រែង ក្រុងស្ទឹងត្រែង ជាអ្នកបើកបរម៉ូតូ និងកុមារីឈ្មោះ ចិត្ត កុចនីម អាយុ៦ឆ្នាំ។ ចំណែកស្ត្រីជាអ្នករួមដំណើរ២នាក់ទៀត ដែលរងរបួសធ្ងន់ មាន ឈ្មោះ សួន សុខុម អាយុ៣១ឆ្នាំ និងឈ្មោះ រីដា ណេង អាយុ១៧ឆ្នាំ ទាំងពីរនាក់ មានលំនៅ បច្ចុប្បន្ន ភូមិសៀមបូក ឃុំសៀមបូក ស្រុកសៀមបូក ខេត្តស្ទឹងត្រែង។
សមត្ថកិច្ចបន្តថា ៖ តាមការពិនិត្យសន្និដ្ឋាន នៅកន្លែងកើតហេតុ ឃើញថា អ្នកបើកបរម៉ូតូ ឈ្មោះ ស្រី ឡៃ បានល្មើសច្បាប់ចរាចរណ៍ ដោយបើកបរ មិនគោរពសិទ្ធិអាទិភាព នៅផ្លូវធំ ផ្ទុកមនុស្សលើសចំនួនកំណត់។ ចំណែកអ្នកបើកបររថយន្ត មិនស្គាល់អត្តសញ្ញាណ ក៏បានល្មើសច្បាប់ចរាចរណ៍ ក្រោយគ្រោះថ្នាក់ បានរត់គេចខ្លួន។
ក្រោយកើតហេតុ រថយន្ត និងម៉ូតូ ត្រូវបាននគរបាលចរាចរណ៍ផ្លូវគោក យកទៅរក្សាទុក នៅស្នងការដ្ឋាននគរបាល ខេត្តស្ទឹងត្រែង ដើម្បីរង់ចាំការដោះស្រាយ តាមផ្លូវច្បាប់៕
