ភ្នំពេញ ៖ នៅឆ្នាំ២០២០ សំណុំរឿងបទល្មើសធនធានធម្មជាតិដែលត្រូវបានបញ្ជូនទៅកាន់ តុលាការ មានចំនួន ៦០៥ករណី ហើយនៅឆ្នាំ២០២០ ខណៈការបង្ក្រាបបទល្មើសក៏សម្រេចបានចំនួន៨.៩១៧ ករណី , មានការផាកពិន័យអន្តរការណ៍លើជនប្រព្រឹត្តល្មើសចំនួន ៨៥៧ករណី និងបទល្មើសដែលត្រូវធ្វើការអប់រំ និងធ្វើកិច្ចសន្យាមានចំនួន ២៩៤៦ករណី។
លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន បានអោយដឹងថា ពេញមួយឆ្នាំ២០២០ មន្ត្រីឧទ្យានុរក្សទាំង ១២០០នាក់ នៃក្រសួងបរិស្ថាន បានចុះល្បាតសរុបចំនួន ២៧,៥៨៨លើក ខណៈនៅការចុះល្បាតនៅឆ្នាំ២០១៩ មានចំនួន ២៤,០៤៨លើក ពោលគឺមានការចុះល្បាតមានការកើនឡើងចំនួន ៣,៥៤០លើក។ ក្នុងការចុះល្បាតនេះ មន្ត្រីឧទ្យានុរក្សដែលជាមន្ត្រីនគរបាលយុត្តិធម៌ បានបង្ក្រាបបទល្មើសបានចំនួន ៨,៩១៧ករណី ខណៈឆ្នាំ២០១៩ បង្ក្រាបបានបទល្មើសធនធានធម្មជាតិចំនួន ៥,៤៧៥ករណី គឺមានការកើនឡើងចំនួន ៣,៤៤២ករណី។
រដ្ឋលេខាធិការក្រសួងបរិស្ថាន បានឱ្យដឹងថា «នៅឆ្នាំ២០២០កន្លងទៅ សំណុំរឿងបទល្មើសធនធានធម្មជាតិដែលត្រូវបានបញ្ជូនទៅកាន់តុលាការមានចំនួន ៦០៥ករណី ហើយនៅឆ្នាំ២០២០ មានការផាកពិន័យអន្តរការណ៍លើជនប្រព្រឹត្តល្មើសចំនួន ៨៥៧ករណី និងបទល្មើសដែលត្រូវធ្វើការអប់រំ និងធ្វើកិច្ចសន្យាមានចំនួន ២៩៤៦ករណី»។
តាមការបញ្ជាក់របស់រដ្ឋលេខាធិការក្រសួងបរិស្ថាន បទល្មើសដែលបង្ក្រាបបានភាគច្រើនជាបទល្មើសលួចកាប់ឈើ ការរុករានទន្ទ្រានកាន់កាប់ដីព្រៃខុសច្បាប់ ការបរបាញ់សត្វ និងការដាក់អន្ទាក់ចាប់សត្វ។
លោក នេត្រ ភក្ត្រា បានថ្លែងថា៖ «ការបង្ក្រាប និងទប់ស្កាត់បទល្មើសមានការកើនឡើង បានបង្ហាញពីការអនុវត្តច្បាប់កាន់តែមានប្រសិទ្ធភាព និងបង្ហាញពីការខិតខំរបស់មន្ត្រីឧទ្យានុរក្ស សហគមន៍តំបន់ការពារធម្មជាតិ និងអ្នកពាក់ព័ន្ធដោយមិនខ្លាចនឿយហត់ក្នុងការចុះល្បាតការពារព្រៃឈើ និងជីវៈចម្រុះ»៕