ខេត្តសៀមរាប ៖ លោក ផែង វណ្ណៈ នៅតែបន្តរងនៅពាក្យបណ្តឹងជាបន្តបន្ទាប់ ដោយពេលនេះ សាលាខេត្តសៀមរាប តាមរយៈលោកមេធាវី អ៊ុន ច័ន្ទថុល ជាតំណាង បានសម្រេចដាក់ពាក្យប្តឹង ចំនួន៣បទល្មើស ពាក់ព័ន្ធបទញុះញង់ឱ្យមានការរើសអើង, បទអំពើញុះញង់ប្រព្រឹត្តតាមផ្លូវសារព័ត៌មាន និងបទប្រមាថចំពោះអ្នករាជការ សាធារណៈ។

យោងតាមពាក្យបណ្តឹងដែលអង្គភាពយើងទទួលបាន គឺសាលាខេត្តសៀមរាបបានប្តឹងលោក ផែង វណ្ណៈ អាយុ៥២ឆ្នាំ ពីបទ៖ ញុះញង់ឲ្យមានការរើសអើង តាមបញ្ញត្តិមាត្រា៤៩៤ និងមាត្រា៤៩៦, បទអំពើញុះញង់ប្រព្រឹត្តតាមផ្លូវសារព័ត៌មាន បញ្ញាត្តិមាត្រា៤៩៧ និងបទប្រមាថចំពោះអ្នករាជការសាធារណៈ បញ្ញត្តិមាត្រា ៥០២ នៃក្រមព្រហ្មទណ្ឌ នៃព្រះរាជាណាចក្រកម្ពុជា ដែលកើតឡើងកាលពីអំឡុងថ្ងៃទី១៤ ១៥ និង ១៦ ខែមីនា ឆ្នាំ២០២១។ ការប្តឹងរបស់សាលាខេត្តសៀមរាប ដោយសំអាងទៅលើភស្តុតាងវីដេអូឃ្លីប និងសំណេរបស់លោក ផែង វណ្ណៈ បានផ្សាយលើទំព័រហ្វេសប៊ុក «Pheng Vannak News» ផ្សាយនៅថ្ងៃទី១៤ និងទី១៥ ខែមីនា ឆ្នាំ២០២១។

ពាក្យបណ្តឹងរបស់សាលាខេត្តសៀមរាប ស្នើសុំឲ្យព្រះរាជអាជ្ញានៃអយ្យការអមសាលាដំបូងខេត្តសៀមរាប៖

ទី១៖ សុំឲ្យធ្វើការពិនិត្យ សម្រេចចោទប្រកាន់ និងផ្តន្ទាទោសឲ្យបានធ្ងន់ធ្ងរបំផុត លើឈ្មោះ ផែង វណ្ណៈ តាមបញ្ញតិ្តមាត្រានៃក្រមព្រហ្មទណ្ឌនៃព្រះរាជាណាចក្រកម្ពុជា។

ទី២៖ សុំទាមទារសំណងជំងឺចិត្តពីឈ្មោះ ផែង វណ្ណៈ ដែលធ្វើឲ្យមានផលប៉ះពាល់ដល់សេចក្តីថ្លៃថ្នូរ កិត្តិយសរបស់អ្នករាជការសាធារណៈនៃសាលាខេត្តសៀមរាបចំនួន ១០០,០០០,០០០ (មួយរយលានរៀល)។

សូមបញ្ជាក់ផងដែរថា លោក ឈិត សុខុន រដ្ឋមន្រ្តីក្រសួងធម្មការ និងសាសនាកម្ពុជា កាលពីថ្ងៃទី១៩ ខែមីនា ឆ្នាំ២០២១ បានធ្វើលិខិតមួយ ស្នើដល់ព្រះរាជអាជ្ញាអមសាលាដំបូងខេត្តកណ្តាល ឱ្យចាត់វិធានការផ្លូវច្បាប់ចំពោះលោក ផែង វណ្ណៈ ដែលបានប្រើប្រាស់ពាក្យសម្តី និងសំណេរ ប្រមាថដល់អាយុជីវិតរបស់ ព្រះមហាវិមលធម្ម ពិន សែម ដោយក្រសួងបានប្តឹងលោក ផែង វណ្ណៈ ទៅកាន់សាលាដំបូងខេត្តកណ្តាល ពីបទប្រមាថសាសនា និងព្រះសង្ឃធ្ងន់ធ្ងរ៕