ពីថ្ងៃនេះដល់ថ្ងៃទី១០ ខេត្តមួយចំនួនប្រឈមនឹងជំនន់ទឹកភ្លៀង

(ភ្នំពេញ) ​៖ ចាប់ពីថ្ងៃទី៧ដល់ថ្ងៃទី១០ ខែសីហា ខេត្តជាប់សមុទ្រ និងខេត្តជាប់ព្រំដែនវៀតណាម នឹងមានភ្លៀងធ្លាក់ខ្លាំង ពិសេសខេត្តក្រចេះ និងត្បូងឃ្មុំ ប្រឈមជំនន់ទឹកភ្លៀង

បើតាមសេចក្ដីជូនដំណឹងរបស់ ក្រសួងធនធានទឹក និងឧតុនិយម នៅថ្ងៃទី០៧ ខែសីហា ឆ្នាំ២០១៩នេះ បានអោយដឹងថាស្ថានភាពអាកាសធាតុនៅកម្ពុជា ចាប់ពីថ្ងៃទី៧ដល់ថ្ងៃទី១០ ខែសីហា រយៈពេល៤ថ្ងៃនេះ ខេត្តជាប់សមុទ្រ និងខេត្តជាប់ព្រំដែនវៀតណាម ពិសេសខេត្តក្រចេះ និងត្បូងឃ្មុំ អាចនឹងមានជំនន់ទឹកភ្លៀង។
ក្រសួងធនធានទឹកបានបញ្ជាក់ថា ដោយសារឥទ្ធិពលនៃប្រព័ន្ធសម្ពាធទាប ធ្វើឲ្យស្ថានភាពអាកាសធាតុនៅកម្ពុជាមានលក្ខណៈ៖

* ភ្លៀងនៅតែបន្តធ្លាក់ដដែល គ្រាន់តែនៅតំបន់មាត់សមុទ្រ ភ្លៀង ខ្យល់ នៅតែបន្តកើតមាន និងស្ថិតក្នុងការប្រុងប្រយ័ត្នខ្ពស់។

* បណ្តាខេត្តដែលស្ថិតនៅជាប់នឹងព្រំប្រទល់វៀតណាម បរិមាណភ្លៀង នឹងកើនឡើងខ្លាំង ពិសេសខេត្តក្រចេះ និងត្បូងឃ្មុំ ដែលអាចបង្កមាន ជាជំនន់ទឹកភ្លៀង។

* កម្លាំងខ្យល់នៅមានកម្រិតខ្លាំងដដែល គឺ១៥-២០ ម៉ែត្រក្នុងមួយវិនាទី។

ក្នុងនោះដែរក្រសួងក៏បានអំពាវនាវឲ្យប្រជាពលរដ្ឋ បន្តមានការប្រុងប្រយ័ត្នខ្ពស់ចំពោះបញ្ហាអាកាសធាតុផងដែរ៕

ភ្ជាប់ទំនាក់ទំនងជាមួយ Town News