ប្រជាជនរាប់ពាន់នាក់នៅតំបន់ព្រំដែនភាគខាងកើតអ៊ុយក្រែននៃទីក្រុង Kharkov កំពុងត្រូវបានជម្លៀសទៅកាន់ទីសុវត្ថិភាព ចំពេលមានប្រតិបត្តិការវាយលុករបស់រុស្ស៊ីនាពេលបច្ចុប្បន្ននៅទីនោះ។ អភិបាលតំបន់ Oleh Syniehubov បានសរសេរនៅលើ Telegram កាលពីថ្ងៃអាទិត្យម្សិលម៉ិញនេះថា មនុស្សប្រហែល 4,000 នាក់បានចាកចេញពីតំបន់នេះរួចហើយក្នុងរយៈពេលពីរថ្ងៃចុងក្រោយនេះ។ គាត់បាននិយាយថា ពួកគេជាច្រើនអាចស្នាក់នៅជាមួយមិត្តភក្តិ និងសាច់ញាតិបាន ខណៈដែលកន្លែងស្នាក់នៅកំពុងត្រូវបានផ្តល់ជូនសម្រាប់អ្នកដទៃ។

អស់រយៈពេលជាង​ពីរ​ឆ្នាំ​បន្ទាប់​ពី​រុស្ស៊ី​បាន​ចូលឈ្លាន​ពាន​ អ៊ុយក្រែន​កំពុង​ជួប​ការ​លំបាក​យ៉ាង​ខ្លាំង​ក្នុង​ការ​ការពារ​ខ្លួន។ នេះ​ជា​ផ្នែក​មួយ​មក​ពី​ការ​ពន្យារ​ពេល​ថ្មីៗ​នេះ​ក្នុង​ការ​ផ្គត់ផ្គង់​សម្ភារៈ​យោធា ​និង​គ្រាប់​រំសេវ​របស់​អាមេរិក។ កងទ័ពរុស្ស៊ីបានបើកការវាយលុកក្នុងតំបន់ព្រំដែនឆ្ពោះទៅកាន់ទីក្រុង Kharkov នៅព្រឹកព្រលឹមថ្ងៃសុក្រ ដោយជំរុញឱ្យមានការព្រួយបារម្ភចំពោះយុទ្ធនាការដណ្តើមយកទីក្រុងធំទីពីររបស់អ៊ុយក្រែន។ ក្រសួងការពារជាតិរុស្ស៊ីបាននិយាយថា ភូមិព្រំដែនអ៊ុយក្រែនជាច្រើននៅជិតក្រុង Vovchansk ត្រូវបានខ្លួនគ្រប់គ្រងហើយ។ កាលពីថ្ងៃអាទិត្យ ទីក្រុងមូស្គូបាននិយាយថា ភូមិចំនួនបួនទៀតត្រូវបានចាប់យក។ អគ្គមេបញ្ជាការ​អ៊ុយក្រែន​លោក Oleksandr Syrskyi បាន​ពណ៌នា​ស្ថានភាព​នៅ​ទីនោះ​ថា​ជា​ការ​លំបាក។

លោក Syrskyi បានសរសេរនៅលើ Telegram កាលពីថ្ងៃអាទិត្យថា ក្នុងសប្តាហ៍នេះ ស្ថានភាពនៅក្នុងតំបន់ Kharkiv កាន់តែអាក្រក់ទៅៗ ។មានការ​ប្រយុទ្ធ​គ្នា​ជា​បន្តបន្ទាប់​នៅ​តាម​តំបន់​ព្រំដែន​តាម​ព្រំដែន​រដ្ឋ​ជាមួយ​សហព័ន្ធ​រុស្ស៊ី។ ខណៈពេលដែលទទួលស្គាល់ថា ស្ថានភាពគឺ លំបាក ហើយថាអ្នកវាយប្រហាររុស្ស៊ីបានសម្រេចជោគជ័យដោយផ្នែក នៅក្នុងតំបន់មួយចំនួន ដោយគាត់បាននិយាយថា កងកម្លាំងការពារអ៊ុយក្រែនកំពុងធ្វើអ្វីគ្រប់យ៉ាង ដែលពួកគេអាចធ្វើបានដើម្បីរក្សាខ្សែការពារ និងទីតាំងរបស់ខ្លួន។

ប្រធានាធិបតីអ៊ុយក្រែនលោក Volodymyr Zelensky ដែលបានអំពាវនាវម្តងហើយម្តងទៀតសម្រាប់ជំនួយអន្តរជាតិបន្ថែមទៀតក្នុងការការពារប្រទេសរបស់គាត់ថ្មីៗនេះ បានប្រកាសថា ការបញ្ឈប់ការវាយលុករបស់រុស្ស៊ីនៅ Kharkov ឥឡូវនេះគឺជាគោលបំណងទី 1។

ក្រសួងការពារជាតិរុស្ស៊ីបានប្រកាសកាលពីថ្ងៃអាទិត្យថា គ្រាន់តែឆ្លងកាត់ព្រំដែនក្នុងតំបន់ Belgorod នៃប្រទេសរុស្ស៊ី អគារលំនៅដ្ឋានពហុជាន់មួយត្រូវបានខូចខាតយ៉ាងធ្ងន់ធ្ងរនៅក្នុងការវាយប្រហារមួយ។ហើយថា យ៉ាងហោចណាស់មនុស្សចំនួន 6 នាក់បានស្លាប់នៅក្នុងការវាយប្រហារនេះ។អគារ​នេះ​បាន​រង​ការ​វាយ​ប្រហារ​ដោយ​​កាំជ្រួច Tochka U របស់​អ៊ុយក្រែន៕

ប្រភព៖ A News

ប្រែសម្រួលដោយ៖ វាសនា