ទីបញ្ជាការកណ្តាលរបស់សហរដ្ឋអាមេរិក (CENTCOM)បាននិយាយកាលពីថ្ងៃច័ន្ទម្សិលម៉ិញនេះថា ជំនួយមនុស្សធម៌ជាង 569 តោនត្រូវបានបញ្ជូនឆ្លងកាត់កំពង់ផែបណ្តោះអាសន្នមួយទៅកាន់តំបន់ហ្គាហ្សាចាប់តាំងពីចាប់ផ្តើមប្រតិបត្តិការកាលពីសប្តាហ៍មុនមក។ CENTCOM បាននិយាយនៅលើបណ្តាញ X ថា នេះគឺជាដំណោះស្រាយបណ្ដោះអាសន្ន ដើម្បីជំរុញជំនួយមនុស្សធម៌ទៅកាន់តំបន់ហ្គាហ្សា ដើម្បីបំពេញតម្រូវការបន្ទាន់របស់ប្រជាជនប៉ាឡេស្ទីន។

កាលពីថ្ងៃទី 17 ខែឧសភា រថយន្តដឹកទំនិញដែលដឹកជំនួយមនុស្សធម៌បានចាប់ផ្តើមធ្វើដំណើរទៅឆ្នេរសមុទ្រតាមច្រកបណ្តោះអាសន្ននៅតំបន់ហ្គាហ្សាស្ទ្រីប។ មន្ទីរបញ្ចកោណបានប្រកាសកាលពីថ្ងៃទី 8 ខែមីនាថា ខ្លួននឹងធ្វើបេសកកម្មសង្គ្រោះបន្ទាន់ដើម្បីបង្កើតផែ ដើម្បីផ្តល់អាហារដល់ទៅ 2 លានក្នុងមួយថ្ងៃ។ បេសកកម្មនេះរួមមានផែអណ្តែតទឹក ដែលជាផ្លូវដែលមានប្រវែង 1,800 ហ្វីត ដែលនឹងត្រូវភ្ជាប់ទៅនឹងច្រាំង និងក្រុមនៃនាវាគាំទ្រផ្នែកដឹកជញ្ជូន។ អ៊ីស្រាអែលបានបន្តការវាយលុកដ៏ឃោរឃៅរបស់ខ្លួនលើតំបន់ហ្គាហ្សាស្ទ្រីប បើទោះបីជាមានដំណោះស្រាយក្រុមប្រឹក្សាសន្តិសុខអង្គការសហប្រជាជាតិទាមទារឱ្យមានការឈប់បាញ់ជាបន្ទាន់នៅក្នុងតំបន់នេះក៏ដោយ។

ប្រជាជនប៉ាឡេស្ទីនជាង ៣៥.៥០០នាក់ត្រូវបានសម្លាប់ ដែលភាគច្រើនជាស្ត្រី និងកុមារ ហើយជាង ៧៩.៦០០ នាក់ផ្សេងទៀតបានរងរបួសចាប់តាំងពីខែតុលាឆ្នាំមុន បន្ទាប់ពីការវាយប្រហារដោយក្រុមហាម៉ាសប៉ាឡេស្ទីន។ ជាងប្រាំពីរខែនៅក្នុងសង្រ្គាមអ៊ីស្រាអែល កន្លែងដ៏ធំនៃតំបន់ហ្កាហ្សាបានខ្ទេចខ្ទាំចំពេលមានការរាំងខ្ទប់អាហារ ទឹកស្អាត និងថ្នាំពេទ្យ។

អ៊ីស្រាអែលត្រូវបានចោទប្រកាន់ពីបទប្រល័យពូជសាសន៍នៅតុលាការយុត្តិធម៌អន្តរជាតិដែលបានបញ្ជាឱ្យធានាថាកងកម្លាំងរបស់ខ្លួនមិនប្រព្រឹត្តអំពើប្រល័យពូជសាសន៍ និងចាត់វិធានការដើម្បីធានាថាជំនួយមនុស្សធម៌ត្រូវបានផ្តល់ជូនដល់ជនស៊ីវិលនៅតំបន់ហ្គាហ្សា៕

     

ប្រភព៖ A News

ប្រែសម្រួលដោយ៖ វាសនា