កញ្ញា មាស សុខសោភា បង្ហោះសារលើក​ទឹកចិត្ត​បងប្អូន​​ខ្មែរ​ឥស្លាម​ឲ្យ​មាន​កិច្ច​សហការជាមួយ​គ្រូពេទ្យ​ ដើម្បី​បញ្ចប់​ការឆ្លង​វីរុស​កូវីដ១៩

(ភ្នំពេញ)៖ តារាចម្រៀងប្រចាំផលិតកម្មថោនកញ្ញា មាស សុខសោភា បានបង្ហោះសារលើកទឹកចិត្ត ដល់បងប្អូនខ្មែរឥស្លាម ក្នុងកាលៈទេសៈកូវីដ១៩ កំពុងតែរាតត្បាតនៅប្រទេសកម្ពុជា។ កញ្ញា មាស សុខសោភា បានបញ្ចេញមតិមួយចំនួន ដើម្បីលើកទឹកចិត្ត និងសូមសំណូមពរឲ្យបងប្អូនខ្មែរឥស្លាម ជាពិសេសនោះ គឺអ្នកដែលត្រឡប់មកពីពិធីបុណ្យសាសនានៅម៉ាឡស៊ី គឺចូលរួមសហការជាមួយនឹង​គ្រូពេទ្យជំនាញ ដើម្បីបង្កា​ចំពោះការរីករាលដាលកាន់តែខ្លាំង នៃវីរុសកូវីដ១៩។

យោងតាមគណនីហ្វេសប៊ុក របស់កញ្ញា មាស សុខសោភា បានរៀបរាប់ថា «ពិភពលោកតែមួយ ផ្ទៃមេឃតែមួយ នេះជាពេលវេលាមួយដែលយើង ត្រូវការកំលាំងចិត្តពីគ្នាទៅវិញទៅមក ដើម្បីឆ្លងដំណាក់កាលដ៏អាក្រក់នេះ។ នាងខ្ញុំពិតជាសោកស្តាយ នៅពេលដែលបានឃើញ ព័ត៌មានទាក់ទងទៅនឹងបងប្អូនខ្មែរ ឥស្លាមដែលកំពុងរងគ្រោះ ដោយសារ Covid-19 ហើយនាងខ្ញុំជឿជាក់ថា អ្វីដែលពួកគាត់ត្រូវការនៅពេលនេះ គឺកំលាំងចិត្តមិនមែនជាការស្តីបន្ទោស ឬការរើសអើងនោះទេ»។

ជាមួយគ្នានេះតារាចម្រៀងប្រចាំផលិតកម្មថោនរូបនេះក៏បានសំណូមពរដល់បងប្អូន ចូលរួមជាកំលាំងចិត្តដល់បងប្អូន ដែលរងគ្រោះទាំងអស់ ជាពិសេសបងប្អូនខ្មែរឥស្លាម សូមបងប្អូនសហការជាមួយគ្រូពេទ្យជំនាញ និងអាជ្ញាធរ ដើម្បីបញ្ចប់ការរីករាលដាលនេះ​។

សូមបញ្ជាក់ថា គិតមកដល់​ថ្ងៃទី២០ ខែមីនា ឆ្នាំ២០២០ កម្ពុជាបានរកឃើញ​ អ្នកឆ្លងជំងឺកូវីដ១៩ កើនដល់ ៤៧នាក់ហើយ ជាមួយគ្នានេះតាមបណ្ដាក្រសួងរដ្ឋនានា បានចេញនូវវិធានការជាបន្ទាន់ ដើម្បីចូលរួមទប់ស្កាត់ ការចម្លងវីរុសនេះ ឲ្យមានប្រសិទ្ធភាព ក្នុងស្មារតីខ្ពស់ទាំងអស់គ្នា៕

ភ្ជាប់ទំនាក់ទំនងជាមួយ Town News
  • ដូច្នឹងផង២