រុស្ស៊ីបានបើកការវាយប្រហារដោយកាំជ្រួចជាច្រើនគ្រាប់លើទីក្រុង Sumy ពេញមួយយប់នៅថ្ងៃទី ១៧ ខែវិច្ឆិកានេះ។ អាជ្ញាធរក្នុងតំបន់បានរាយការណ៍ថា កាំជ្រួចផ្លោងរបស់រុស្ស៊ីបានវាយប្រហារអគារលំនៅដ្ឋានមួយក្នុងទីក្រុង Sumy នៅម៉ោងប្រហែល 9 និង30 យប់ ម៉ោងក្នុងស្រុក ដោយបានសម្លាប់មនុស្សចំនួន ១១ នាក់ និងរបួស ៦៨ នាក់ផ្សេងទៀត។ អាជ្ញាធរបាននិយាយថា ក្នុងចំណោមអ្នកស្លាប់ទាំងនោះមានក្មេងប្រុសអាយុ ៩ ឆ្នាំម្នាក់ និងក្មេងស្រីអាយុ ១៤ ឆ្នាំម្នាក់ និងក្មេង ១០ នាក់ផ្សេងទៀតរងរបួស។
ក្រោយមកនៅពេលល្ងាច កាំជ្រួចរុស្ស៊ីលើកទីពីរបានវាយប្រហារហេដ្ឋារចនាសម្ព័ន្ធថាមពលនៅវេលាម៉ោងប្រហែល 12 និង 30 នាទីព្រឹកម៉ោងក្នុងស្រុកនៅថ្ងៃទី 18 ខែវិច្ឆិកានេះ ដែលធ្វើឱ្យផ្នែកខ្លះនៃទីក្រុងគ្មានថាមពលប្រើប្រាស់។ មិនទាន់មានព័ត៌មានណាមួយអាចបញ្ជាក់បានភ្លាមៗអំពីការខូចខាតឬរបួសដែលកើតចេញពីការវាយប្រហារដោយកាំជ្រួចលើកទីពីររបស់រុស្សីនោះទេ។
ប្រធានាធិបតីអ៊ុយក្រែន Volodymyr Zelensky បានថ្កោលទោសការវាយប្រហារដំបូងលើ Telegram “ការវាយប្រហារដោយគ្រាប់រ៉ុក្កែតលើអគារប្រាំបួនជាន់នៅក្រុងស៊ូមី។ យើងដឹងពីអ្នកស្លាប់ និងរបួស រួមទាំងកុមារផងដែរ។ ខ្ញុំសូមចូលរួមរំលែកទុក្ខដល់ក្រុមគ្រួសារ និងមិត្តភក្តិ។ ឧក្រិដ្ឋជនត្រូវតែទទួលទោសចំពោះការសម្លាប់មនុស្សស្លូតត្រង់»។
អភិបាលក្រុងស្តីទី លោក Artem Kobzar បាននិយាយថា គ្រាប់រ៉ុក្កែតក៏បានវាយប្រហារលើទីធ្លានៃអគារនេះ បណ្តាលឱ្យមានការខូចខាតយ៉ាងធ្ងន់ធ្ងរ ។ សេវាសង្គ្រោះបន្ទាន់កំពុងបន្តជួយជនរងគ្រោះ ខណៈដែលប្រព័ន្ធផ្សព្វផ្សាយក្នុងស្រុករាយការណ៍ពីផលប៉ះពាល់ជាបន្តបន្ទាប់នៃការវាយប្រហារ។ ការវាយប្រហាររបស់រុស្ស៊ីប្រឆាំងនឹងតំបន់ Sumy បានក្លាយទៅជាការបំផ្លិចបំផ្លាញកាន់តែខ្លាំងឡើងក្នុងប៉ុន្មានខែថ្មីៗនេះ ចំពេលមានការភ័យខ្លាចថា រុស្ស៊ីអាចនឹងចាប់ផ្តើមការវាយប្រហារថ្មីលើតំបន់ Sumy ក្នុងប៉ុន្មានខែខាងមុខនេះ។
ការបាញ់ផ្លោងគឺបានកើតឡើងប្រចាំថ្ងៃសម្រាប់សហគមន៍នៅជិតព្រំដែនភាគឦសាននៃប្រទេសអ៊ុយក្រែនជាមួយប្រទេសរុស្ស៊ី ដោយអ្នកស្រុកនៅតំបន់ព្រំដែន ដែលងាយរងគ្រោះនៃតំបន់នេះជួបប្រទះការវាយប្រហារជាច្រើនដងក្នុងមួយថ្ងៃៗ។ ការវាយប្រហារលើ Sumy ធ្វើឡើងបន្ទាប់ពីការវាយប្រហារទ្រង់ទ្រាយធំលើហេដ្ឋារចនាសម្ព័ន្ធថាមពលនៅទូទាំងប្រទេសកាលពីយប់មុន ដែលបណ្តាលឱ្យជនស៊ីវិលយ៉ាងហោចណាស់ 7 នាក់ស្លាប់ និង 19 នាក់ផ្សេងទៀតបានរងរបួសនៅទូទាំងតំបន់ជាច្រើន៕
