លោក Igor Kirillov ឧត្តមសេនីយ៍ជាន់ខ្ពស់ទទួលបន្ទុកកងកម្លាំងការពារនុយក្លេអ៊ែររបស់រុស្ស៊ី ត្រូវបានសម្លាប់កាលពីថ្ងៃអង្គារម្សិលម៉ិញនេះ ដោយការបំផ្ទុះគ្រាប់បែកនៅក្នុងទីក្រុងមូស្គូ។ប្រភពមួយនៅក្នុងសេវាសន្តិសុខអ៊ុយក្រែន (SBU) ដែលនិយាយទៅកាន់ Al Jazeera បានអះអាងពីការទទួលខុសត្រូវចំពោះការបំផ្ទុះគ្រាប់បែកនេះ។
គណៈកម្មាធិការស៊ើបអង្កេតរបស់ប្រទេសរុស្ស៊ីបាននិយាយនៅក្នុងសេចក្តីថ្លែងការណ៍មួយថា នៅអំឡុងពេលប៉ុន្មានម៉ោងដំបូងកាលពីថ្ងៃអង្គារ Kirillovត្រូវបានសម្លាប់ ដោយគ្រាប់បែកដែលលាក់នៅក្នុងម៉ូតូអគ្គិសនីនៅខាងក្រៅអគារផ្ទះល្វែងមួយនៅលើ Ryazansky Prospekt ។ ទីតាំងវាយប្រហារមានចម្ងាយ 7គីឡូម៉ែត្រនៅភាគអាគ្នេយ៍នៃវិមានក្រឹមឡាំង។
អ្នកស្រី Yulia Shapovalova មកពី Al Jazeera ដែលរាយការណ៍នៅជិតកន្លែងផ្ទុះនោះបាននិយាយថា “កាបូបសាកសពពីរអាចត្រូវបានគេមើលឃើញនៅតាមផ្លូវ” ។ ដោយវិនិច្ឆ័យតាមបង្អួចដែលបែកខ្ទេចខ្ទី រលកបំផ្ទុះបានឈានដល់ជាន់ទី ៤ ដោយផ្ទះល្វែងប្រហែល ១០ ល្វែងត្រូវបានគេរាយការណ៍ថារងការខូចខាតយ៉ាងដំណំ។
Kirillov មានអាយុ 54 ឆ្នាំនៅពេលគាត់ទទួលមរណភាពបានបម្រើការជាប្រធានកងទ័ពការពារវិទ្យុសកម្ម គីមី និងជីវសាស្ត្រ តាំងពីខែមេសា ឆ្នាំ 2017មកម្ល៉េះ។ កងកម្លាំងពិសេសនៅក្នុងយោធារុស្ស៊ី ពួកគេប្រតិបត្តិការក្រោមលក្ខខណ្ឌនៃការចម្លងរោគវិទ្យុសកម្ម គីមី និងជីវសាស្រ្ត។ Kirillov បានរៀបការ ដោយមានកូនប្រុសចំនួន២នាក់។ ឧត្តមសេនីយរុស្ស៊ីរូបនេះ ស្ថិតនៅក្រោមការដាក់ទណ្ឌកម្មពីប្រទេសមួយចំនួន រួមទាំងចក្រភពអង់គ្លេស និងកាណាដាផងដែរ ចំពោះតួនាទីរបស់គាត់ក្នុងសង្គ្រាមនៅអ៊ុយក្រែន។
គណៈកម្មាធិការស៊ើបអង្កេតរុស្ស៊ីបាននិយាយថា “លោក Igor Kirillov ដែលជាប្រធានផ្នែកការពារវិទ្យុសកម្ម គីមី និងជីវសាស្រ្តនៃកងកម្លាំងប្រដាប់អាវុធនៃសហព័ន្ធរុស្ស៊ី និងជំនួយការរបស់គាត់ត្រូវបានសម្លាប់” ។ គណៈកម្មាធិការស៊ើបអង្កេតរបស់ប្រទេសរុស្ស៊ីបានប្រកាសថា សំណុំរឿងព្រហ្មទណ្ឌត្រូវបានបើក។ លោកស្រី Svetlana Petrenko អ្នកនាំពាក្យរបស់គណៈកម្មាធិការនេះ បាននិយាយនៅក្នុងសេចក្តីថ្លែងការណ៍មួយថា ទីក្រុងម៉ូស្គូកំពុងចាត់ទុកការបំផ្ទុះគ្រាប់បែកនេះថា ជាការវាយប្រហារភេរវកម្ម។
លោក Dmitry Medvedev អនុប្រធានក្រុមប្រឹក្សាសន្តិសុខរបស់រុស្ស៊ី បាននិយាយថា ដោយដឹងពីភាពចៀសមិនរួចនៃការបរាជ័យផ្នែកយោធារបស់ខ្លួន [អ៊ុយក្រែន] ចាប់ផ្តើមការវាយប្រហារដោយកំសាក និងគួរឱ្យស្អប់ខ្ពើមនៅក្នុងទីក្រុងសន្តិភាពមួយនេះ៕
អ៊ុយក្រែនបានចាត់ទុក Kirillov គឺជាឧក្រិដ្ឋជនសង្គ្រាម និងជាគោលដៅស្របច្បាប់ពិតប្រាកដ ចាប់តាំងពីគាត់បានចេញបញ្ជាឱ្យប្រើប្រាស់អាវុធគីមីហាមឃាត់ប្រឆាំងនឹងយោធាអ៊ុយក្រែន។ការសងសឹកចំពោះឧក្រិដ្ឋកម្មសង្រ្គាមគឺចៀសមិនរួច។នេះបើតាមមន្ត្រីដែលមិនបញ្ចេញឈ្មោះបានប្រាប់ Politico ។ កាលពីថ្ងៃច័ន្ទ SBU បានចោទប្រកាន់លោក Kirillov ពីការប្រើប្រាស់អាវុធគីមីដែលត្រូវបានហាមឃាត់នៅអំឡុងពេលការឈ្លានពានពេញលេញរបស់រុស្ស៊ីលើប្រទេសអ៊ុយក្រែនដែលបានចាប់ផ្តើមនៅក្នុងខែកុម្ភៈឆ្នាំ 2022 ។ នៅក្នុងសេចក្តីថ្លែងការណ៍មួយកាលពីថ្ងៃចន្ទ SBU បាននិយាយថា កងកម្លាំងរបស់ប្រទេសរុស្ស៊ីបានប្រើប្រាស់ប្រភេទផ្សេងគ្នានៃគ្រាប់បែកគីមីហាមឃាត់ប្រឆាំងនឹងអ៊ុយក្រែនច្រើនជាង 4,800 ដង៕
ប្រែសម្រួលដោយ៖ វាសនា
