ការវាយប្រហាររបស់អ៊ីស្រាអែលបានសម្លាប់ជនជាតិប៉ាឡេស្ទីនជាង 200 នាក់នៅទូទាំងតំបន់ហ្គាហ្សាក្នុងរយៈពេលបីថ្ងៃចុងក្រោយនេះ ខណៈដែលយោធានៅតែបន្តវាយលុកអគារលំនៅដ្ឋាន ប្រជាជនដែលប្រមូលផ្តុំគ្នានៅតាមដងផ្លូវ ផ្សារ និងទីជម្រក។ លោក Hani Mahmoud របស់ Al Jazeera រាយការណ៍ពី Deir el-Balah បាននិយាយថា ទោះបីជាអ៊ីស្រាអែលអះអាងថា ខ្លួនកំពុងកំណត់គោលដៅលើក្រុមយុទ្ធជនហាម៉ាសក៏ដោយ ជនរងគ្រោះភាគច្រើនគឺជាប្រជាជនស្លូតត្រង់។
លោកបានថ្លែងថា៖ «យើងកំពុងមើលឃើញស្ត្រី និងកុមាររួមគ្នាជាច្រើននៃអ្នកស្លាប់បាត់បង់ជីវិត»។ មន្ទីរពេទ្យត្រូវបានគ្របដណ្ដប់ដោយអ្នកស្លាប់ និងរបួស ការវាយប្រហារដោយផ្ទាល់ទៅលើបរិក្ខារពេទ្យ និងការខ្វះខាតការផ្គត់ផ្គង់យ៉ាងធ្ងន់ធ្ងរ នៅពេលដែលអ៊ីស្រាអែលដាក់ការឡោមព័ទ្ធយ៉ាងតឹងរ៉ឹងនៅតំបន់នោះ។ នៅមន្ទីរពេទ្យ Al-Aqsa Martyrs ក្នុងទីក្រុង Deir el-Balah អ្នករងរបួសជាច្រើននាក់បានស្លាប់មុនពេលពួកគេអាចព្យាបាលបាន។
សង្គ្រាមរបស់អ៊ីស្រាអែលលើតំបន់ហ្គាហ្សាឥឡូវនេះបានសម្លាប់ជនជាតិប៉ាឡេស្ទីនយ៉ាងហោចណាស់ 45,805 នាក់ និងរបួស 109,064 នាក់ចាប់តាំងពីថ្ងៃទី 7 ខែតុលា ឆ្នាំ 2023នោះមក។ យ៉ាងហោចណាស់មនុស្សចំនួន 1,139 នាក់ត្រូវបានសម្លាប់នៅក្នុងប្រទេសអ៊ីស្រាអែល នៅអំឡុងពេលការវាយប្រហារដែលដឹកនាំដោយក្រុមហាម៉ាសនៅថ្ងៃនោះ ហើយប្រហែល 250 នាក់ត្រូវបានចាប់ខ្លួន៕
ប្រែសម្រួលដោយ៖ វាសនា
